FRETILIN “Lakohi Fó Fatin” ba Arão iha Komisaun Espesializada

Deputadu Bankada CNRT iha PN, Arão Noé de Jesus da Costa Amaral iha momentu sei tuur iha meza Prezidente PN Deputadu Bankada CNRT iha PN, Arão Noé de Jesus da Costa Amaral iha momentu sei tuur iha meza Prezidente PN Foto File

Tempotimor (Dili)-Bankada FRETILIN iha Parlamentu Nasional la konkorda ho desizaun meza PN nia atu reduz númeru deputadu bankada FRETILIN iha Komisaun espesializada hodi fó fali ba eis Prezidente PN Arão Noe atu prienxe.

Bankada FRETILIN hahú kestiona bainhira númeru deputadu ne’ebé bankada FRETILIN propoin sai membru Komisaun E menus iha projetu deliberasaun ne’ebé meza PN hasai.

Xefe bankada FRETILIN Fancisco Miranda Branco hatete, molok ne’e bankada FRETILIN aprezenta ninia deputadu na’in 3 ba komisaun E, maibé meza PN hasai fali na’in ida.

Tan ne’e, Branco dehan, projetu deliberasaun ba membru komisun E ne’ebé meza PN aprezenta la tuir lista ne'ebe mak FRETILIN aprezenta ba meza.

Ho nune’e, Branco husu ba meza PN atu adia debate projetu deliberasaun ida ne'e nune'e Bankada FRETILIN bele deside lista foun ba deputadu FRETILIN ne'ebé atu envolve iha komisuan E.

"Ha’u hanoin meza presiza adia hikas projetu deliberasun ba komisun E nian tanba ami konfuzu uitoan no ami mós la aseita ba lista membru komisaun, tanba antes ne'e bankada FRETILIN fo lista deputadu hamutuk na’in 3, maibé meza fó sai fali katak deputadu FRETILIN na’in 2 de’it, entaun ami presiza lori fila fali ba Banlada depois deside," dehan Branco iha diskusan ba projetu deliberasaun ba estrutura Komisaun espesializada ne'ebe hala'o liu husi realizasun plenaria extra-ordinariu iha PN, Kuarta (29/07).

Iha fatin hanesan, deputadu Bankada PLP, Francisco Vasconcelho konsidera projetu deliberasaun ba komisaun espesializada hodi fó oportunodade ba deputadu ne'ebé seidauk envolve iha komisun ne'e  di’ak liu muda ba loron seluk, tanba asuntu ne'e la'os urjensia.

Ba kestaun ne'e, Vise Prezidente PN Maria Angelina Sarmento, konkorda hodi adia debate ne'e ba iha Kinta (30/07).

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.