Tempotimor (Dili) - Ministru Asuntu Parlamentár Komunikasaun Sosiál (MAPKomS), Francisco Jerónimo, nafatin defende direitu jornalista ba subsídiu front line. Tanba ne’e, husu lalika ta'uk tanba direitu ne’e sei la lakon.
Tuir nia, lista hotu entrega ona ba iha Ministériu Finansas (MF), maibé kuandu iha fallansu uitoan nafatin buka meius hodi defende jornalista sira nia direitu.
"MAPKomS nia pozisaun nafatin defende jornalista sira front line no ha'u halo solusaun nafatin no validasaun. Ikus liu ne'e iha Ministériu Finansas (MF) atu oinsá mós ita-boot (jornalista) sira fiar nafatin ha’u lalika ta’uk, ha'u defende nafatin ita boot sira", dehan MAPKomS, hafoin reuniaun Konsellu Ministru, iha Palasiu Governu, Kuarta (29/7).
Iha fatin hanesan, Ministru Finansas (MF), Fernando Hanjam hatete, prosesu ba direitu jornalista sira front line lista husi MAPKomS entrega hotu ona, maibé enkuadramentu legal mak seidauk. Tanba ne'e, parte rua sei halo ordenasaun para bele hamosu rezolusaun ida atu bele halo pagamentu.
"Kona-ba jornalista sira nian klaru husi MAPKomS lista ne'e ba tiha ona, maibé enkuadramentu legál seidauk iha", tenik nia.
Maski enkuadramentu legál seidauk iha maibé, nia dehan, foti ona iha Konsellu Ministru para bele haree enkuadramentu legál no halo rezolusaun hodi bele kobre jornalista sira-nia direitu.
"Baze legál laiha ami labele halo pagamentu. Tanba ne'e, mak ohin ha'u konfirma ona MAPKomS para halo rezolusaun para bele rezolve", tenik nia.
Nia mos dehan, iha tempu badak sei rezolve baze legál ne'e atu rezolve lalais asuntu ne’e.
"Ami sei rezolve lalais, agora ha'u ba fó hatene ekipa jurídiku tenke ko'alia malu ho ekipa jurídiku husi MAPKomS nian para haree asuntu ne'e", dehan Ministru Fernando. (*)