Ahi Han Hostel iha Australia, Timor-oan 10 sai Vitima

Ahi han hostel fatin ne'ebe Timoroan na'in sanolu hela ba iha Bundaberg Queensland Australia (20/7) Ahi han hostel fatin ne'ebe Timoroan na'in sanolu hela ba iha Bundaberg Queensland Australia (20/7) Foto suplai

Tempotimor (Dili)-Timor-oan na’in 10, mane na’in 8 no feto na’in 2, ne’ebé durante ne’e hala’o serbisu iha Australia hetan dezastre hafoin ahi han sira-nia hela fatin iha Hostel Federal Backpacker Bundaberg Queensland Australia, iha Segunda (20/07), maizumenus tuku 10.30 kalan oras Australia.

Xefe Ekipa trabaladór Timor-oan ne’ebé sai vitima, José de Jesus Viegas informa, hafoin fila husi serbisu, tanba kolen sira hotu tama ida-idak nia kuartu hodi toba, maibé teki-teki sira rona alarma lian no sira halai sai.

"Maizumenus tuku 10 ho balun, kalan, ami serbisu kolen entaun deskansa hotu ona, derrepente alarma ne'e lian no Hostel Federal Backpacker Bundaberg Quislannd Australia na'in hakilar mai ami dehan ‘imi hotu sai tiha ba li’ur ho emerjensia’, maibé ami la hatene saida mak atu akontese," José konta ba www.tempotimor.com, Tersa (21/07).

Maske la kompriende, maibé, José hatutan, nia ho nia kolega na’in 10 halai hotu ba li’ur hodi salva an.

"Ami sai tiha ba li’ur nein lori ho sasan no kolega balun konsege lori sai sira-nia pasaporte i ha’u rasik, inklui kolega balun, la lori sai pasaporte no sasan, ami sai de'it ho kalsa no faru tahan ida ne'ebé ami hatais, entaun sasan ami labele salva, so salva de'it mak ami-nia isin,” nia hatete.

Hafoin akontesimentu ne’e, nia informa, nia ho nia kolega na’in 10 hetan ona apoiu husi komunidade, igreja, no organizasaun balun.

Daudauk ne’e, nia dehan, parte ajensia ne'ebé responsavel ba sira-nia serbisu, kordena ho organizasaun balun hodi muda sira ba fatin seluk ne’ebé seguru.

"Agora daudaun ajensia mak serbisu hamutuk ho organizasaun balun ne'ebé iha ne'e suporta ona ami ho hahan no roupa balun, i sira muda ona ami ba fatin seluk, ne'ebé agora ami sente di’ak uitoan,” dehan nia.

José dehan, nia parte mós kontatu ona ho konsuladu Timor-Leste no embaixada TL iha Australia.

"Ohin ha’u liga ona ba konsuladu Timor-Leste no nia official kontaktu ona Embaixadora i embaixadora mós kontaktu ona sira nia team leader. Ohin dader ami mós hetan osan $2700 no foin dadaun kalan ne'e hetan tan $500."

Entretantu, Traballadór Timor-oanliu husi programa seasional workers ne'ebé hetan dezastre iha Australia mak; José de Jesus viegas (Bobonaru), Isaias da Costa Cardoso (Manufahi), Rabina de Jesus (Lautem), Bernardina Leu Mau Santos (Bobonaro), Longuinos Afonso (Vikeke), Irwan da Conceição (Dili), Juliviano de Oliveira de Almeida (Baukau), Leopoldino Martins Soares (Ermera), Natalisto Nazario dos Santos (Lautem), no Abelino da Conceição Mendonca (Dili).

Tuir informasaun, Timor-oan hirak ne’e hahú hala’o serbisu iha Australia iha Novembru 2019.

Rate this item
(2 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com
Darwin_Optic

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com

Kalendariu Arkivu

« May 2021 »
Mon Tue Wed Thu Fri Sat Sun
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31            

Tempo Timor Networks

Online Counter