Relatoriu Vise MOP: Populasaun 50% La Asesu Bee-moos, 20% Seidauk Hetan Naroman

Vise Ministru Obras Publiku Nicolao Lino Freitas ko'alia ba Jornalista hafoin sorumutuk ho Primeiru Ministru Taur Matan Ruak iha Palasiu Governu (21/7) Vise Ministru Obras Publiku Nicolao Lino Freitas ko'alia ba Jornalista hafoin sorumutuk ho Primeiru Ministru Taur Matan Ruak iha Palasiu Governu (21/7) Foto Tempo Timor

Tempotimor (Dili)-Vise Ministru Obras Publiku Nicolao Lino Freitas relata ba Primeiru Ministru Taur Matan Ruak katak, to’o ohin loron populasaun Timor-Leste porsentu 50 mak seidauk asesu bee-moos no porsentu 20 mak seidauk asesu ba eletrisidade.

Vise MOP ne’e dehan, bazeia ba dadus husi Aqua no Saneamentu, komunidade ne’ebé asesu ona bee-moos hamutuk porsentu 50, signifika falta porsentu 50 mak seidauk asesu bee-moos.

"Dadus ne’ebé iha Aqua Sanemantu, komunidade tomak foin asesu 50%, signifika katak sei iha 50%, Ministru Obras Públiku sei esforsu atu haree liu iha orsamentu," dehan nia hafoin hasoru-malu ho Primeiru Ministru Taur Matan Ruak iha Palasiu Governu, Tersa (21/07).

Kona-ba eletrisidade, nia hatete, maioria populasaun hetan ona asesu, maibé hela de’it porsentu 20 mak seidauk hetan.

Ba kestaun ida ne’e, nia hatete, iha tinan 2021 MOP sei tau prioridade hodi rezolve.

Entretantu, molok ne’e, Jestór Programa HAK, Adelio da Costa informa, iha tinan 2019 HAK foti dadus uma-kain suku no aldeia sira ne’ebé hetan asesu ba bee-moos.

Ba dadus jeral iha Timor-Leste, nia hatete, iha aldeia 349 husi suku 57, uma-kain 34.391 mak asesu kanalizasaun bee. Husi númeru ne’e, uma-kain ne’ebé asesu bee mota hamutuk 4.643 no bee posu hamutuk 3.447.

Ba uma-kain ne’ebé konsumu bee-mota, nia hatete, númeru barak liu iha kapital Dili ho total uma-kain 1.754.

“Iha kapital Dili ne’ebé tuir HAK nia deskobrementu iha suku hamutuk 7, aldeia hamutuk 61, ho nia total uma-kain hamutuk 13.660, uma-kain ne’ebé konsege hetan kanalizasaun bee-moos hamutuk 11.641, no uma-kain ne’ebé la konsege hetan kanalizasaun bee-moos no konsumu de’it bee mota hamutuk 1.754,” informa Adelio iha nia knar fatin, Farol, Segunda (20/07).

Aleinde bee mota, nia hatete, iha uma-kain 265 iha Dili mak durante ne’e konsumu bee posu.

Tuir nia, uma-kain barak iha Dili seidauk asesu bee-moos tanba atetude komunidade nian, tanba iha komunidade barak mak uza sanyo hodi dada bee, nune’e komunidade sira seluk la asesu.

“Sira hetan kanalizasaun husi SAS, maibé sira uza Sanyo, entaun komunidade sira ne’ebé hela iha kotuk labele asesu, nune’e sira konsumu de’it bee posu, bee ne’ebé sira baku rasik,” dehan nia.

Nia dehan, dekretu lei númeru 4/2004 bandu ema atu fura bee, tanba bee iha rai okos ne’e estadu nian.

“Maibé ema barak no mós kompaña barak maka uza hela bee posu, hanesan ootel boot sira, ne’e sira uza bee rai laran, bee ne’ebé sira fura rasik, loloos ne’e estadu tenke kontrola, tanba na’in ba rikusoin iha rai okos ne’e mak estadu.”

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.