Koordenadór SD Xina, Rogerio Pinto hatete, asaun husi grupu Rezistensia Nasionál Defende Justisa no Konstituisaun Republlika Demokratika Timor-Leste (RNDJ-KRDTL) afeita maka’as ba prosesu aprendizajen iha sira-nia eskola.

"Atividade politika halo besik iha eskola ne'e, entaun movimentu ne'e interompe prosesu aprendizajen, ne'ebé ami la konsege hala'o aula, tanba sira toka no kanta," dehan Koordenadór ne’e iha areador SD Xina, Bairo Formoza, Sesta (17/07).

Nia dehan, molok ne’e parte RNDJ-KRDTL la fó karta koñesimentu ruma ba eskola, nune’e parte eskola la hatene ohin iha konsentrasaun massa iha area refere.

“Dala-ruma sira la fó karta mai ne'e tanba asaun ne'e fora husi aredor eskola, maibé asaun refere besik loos eskola entaun implika ba prosesu aula,” dehan nia.

Nia hatete, bainhira asaun mak kontinua sei halo prosesu aprendizajen iha SD Xina paradu.

"Se asaun ne'e kontinua, halo beibeik iha ne’ebá, ami labele fó eskola, tanba barullu, aula la'o la di’ak, agora oinsa atu haree ne'e, so na’i-ulun sira mak haree took."

Iha fatin hanesan, profesora SD Xina, Sezaria Fernandes husu ba grupu RNDJ-KRDTL atu halo tan asaun karik tenke dook husi SD Xina.

Se hakarak kontinua, nia sujere ba grupu RNDJ-KRDTL atu halo asaun hafoin estudante sira sai eskola.

"Di’ak liu ami sai tiha eskola ba mak kontinua halo asaun, tanba ami eskola sai tuku 12:00, tanba halo dader ne'e implika ba aula tanba barullu, ami ko'alia alunus mós la rona,” dehan nia.

Se grupu RNDJ mak kontinua halo asaun iha tempu estudante sira tama aula, profesora ne’e hatete, di’ak liu eskola deside fó feriadu ba estudante sira.