Lere: Uluk Ami Defende Xanana ho Raan, Imi iha ne’ebé?

Kay rala Xanana Gusmao hamutuk ho Mahuno, Taur Matan Ruak, Lu Olo no Lere Anan Timur iha seremonia loron veretanus nasional iha palasiu do Governu iha tinan ruma kotuk Kay rala Xanana Gusmao hamutuk ho Mahuno, Taur Matan Ruak, Lu Olo no Lere Anan Timur iha seremonia loron veretanus nasional iha palasiu do Governu iha tinan ruma kotuk Foto Suplai

Tempotimor (Dili)-Xefe Estadu Maiór FALINTIL Forsa Defeza Timor-Leste (F-FDTL) Maijór Jenerál Lere Anan Timur kestiona deputadu CNRT sira iha Parlamentu Nasionál ne’ebé baku hirus-matan hodi dehan defende Xanana.

Nia dehan, ohin loron balun hamriik basa hirus-matan hodi deklara defende Xanana Gusmão, maibé la hatene katak, Lere ho maluk veteran sira uluk defende ho sira-nia raan.

“Iha PN ne’ebá dehan katak ‘ami defende maun Xanana’, entaun ami sira ne’e, ami uluk defende ho ami-nia ran, ami-nia mate, ne’e ami la ko’alia buat ida, imi ida uluk lakohi ukun an, agora imi mak dehan defende maun Xanana,” dehan Lere hafoin hasoru Prezidente Repúblika Francisco Guterres Lu Olo, Kuarta (15/07).

Tuir nia, daudauk ne’e Parlamentu Nasionál (PN) iha hela prosesu rekonsiliasaun, tanba otonomista barak mak iha PN.

Lere dehan, daudauk ne’e ema ne’ebé uluk lakohi ukun an mós tuur hela iha PN hodi koalia barak kona-ba defende povu nia direitu.

“PN ne’ebá agora dadaun ne’e ita rekonsiliasaun hela, rekonsiliasaun ema ne’ebé uluk lakohi ukun an mós iha PN ne’ebá, depois ibun boot no dehan katak defende povu nia direitu, be uluk funu ne’e o la defende,” dehan Lere ba jornalista sira iha Palásiu Prezidensiál Bairru-pite Dili, Kuarta (15/07).

Lere dehan, iha demokrásia bele ko’alia, maibé tenke iha limitasaun.

“Ha’u hanoin katak, deputadu sira ko’alia, loos iha demokrásia, mais iha mós nia limite, deputadu sira iha ne’ebá mós tenke rekoñese ‘o nia pasadu ne’e, o labele dehan ita hanesan de’it’.”

“Veteranu sira mós balun tuur iha PN ne’ebá. Ha’u mak deputadu tuur iha ne’ebá karik, ema ruma kuandu krítika ha’u-nia maluk, ha’u nonok, se vota dehan oho tiha nia mós ha’u la foti kartaun, ha’u abstensaun, ita tenke hateke ba kotuk, uluk ita iha ai-laran ne’e ita terus oinsa, ne’e mak tenke hanoin, mais iha ne’ebá lae, deputadu balun aproveita veteranu par hamriik iha oin,” dehan Lere.

Nia mós dehan, deputadu sira ne’ebé iha PN, uluk balun iha Indonézia nia tempu fahe Timor-oan, agora mós kontinua fahe.

“Fahe nafatin ba, deputadu sira iha PN, balun uluk Indonézia nia tempu fahe ita, agora hakarak fahe tan nafatin, fahe de’it ba, sira iha PN ne’e mak tenke hatene an, namdigas, sira ne’ebá hotu-hotu rezisténsia nia ema, sira ne’ebá barak mak otonomista, agora defende sira-nia tasu, familia, Pensaun Vitalisia ne’ebé tinan lima nian ne’e,” nia dehan

Rate this item
(5 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.