Tuir nia, Lei Kriminaliza Difamasaun la hamate liberdade espresaun no la defende governante ka politiku-nain sira.

"Lei ne'e la hamate liberdade espresaun no la defende governate, politiku sira, Lei ne'e defende sidadaun no Lei  ne'e la hatete iha ne’eba atu labele tolok governante, lae, iha ne’eba dehan de'it labele tolok, insultu o nia maluk no labele duun matak no bosok ema," dehan Cárceres hafoin reuniaun Konsellu Ministru iha palasiu governu, Kuarta (15/07).

Nia afirma, lei kriminaliza difamasaun la’os atu defende ukun-nain, tanba iha lei ne’e la temi atu defende Prezidente Republika, Ministru, Deputada ka jornalista sira.

"Lei ne'e ba sidadaun, tanba laiha artigu ida atu defende ukun-nain sira, ita-boot sira bele garante, kaer ha’u-nia lia-fuan ne'e, bainhira esbosu ne'e sai depois rona tiha hotu-hotu nia lian no preokupasaun, hadi'a tiha, laiha artigu ida mak sei defende ukun-nain sira iha ne’eba, artigu hotu-hotu defende direitu, onra ou reputasaun sidadaun nian," dehan nia.

Iha lei ne’e, nia esplika, bainhira ema ida sente ofendidu tanba ema seluk bosok no hakarak hamonu nia onra, nia bele lori kazu ne’e ba tribunal.

"Ita-boot bosok no trata ha’u-nia naran maibé, ha’u la liga, ne'e laiha prosesu, tanba ha’u la keixa, so keixa mak bele iha prosesu, ne'e krimi semi publiku, ne’ebé atu ameasa to'o iha ne’ebé, atu halo to'o iha ne’ebé, ne'e idaidak nia direitu, ha’u simu ona pareser barak no rona konferensia imprensa barak maibé, ne'e direitu," dehan nia.

Nia dehan, Lei Kriminaliza Defamasaun ne'e sei hein Lei Anti Korupsaun aprova tiha iha komisaun A Parlamentu Nasional mak foin aprezenta ba Konsellu Ministru.