Tuir Ministru Prezidénsia Konsellu Ministru, Fidelis Leite Magalhaes katak, ohin reuniuan interministeriál hodi responde ba dezastre naturais ne'ebé akontese iha fulan hirak liu-ba hanesan iha fulan outubru tinan kotuk no iha loron 13 fulan marsu iha akontesimentu inundasaun nomos fulan maiu akontese dezastre iha Kosta Sul.

"Objetivu husi reuniaun ne'e mak atu halo avaliasaun ba medidas hotu ne'ebé Governu foti ona, hodi resposta ba vítima sira ne'ebé hasoru inundasaun, tuir nível estragu, hanesan sira nia hela fatin ne'ebé hetan estragu no asesu ba aihan nomos nesesidade ne'ebé mak koordena ona husi Ministru Administrasaun Estatal," dehan Ministru Fidelis, hafoin reuniaun Liña-Ministeriál, iha Palásiu Governu, Segunda (22/06).

Governante ne'e afirma, enkontru entre ministeriál ne'e mos ko'alia kona-bá evaluasaun esforsu Governu nian, atu hadi'a fali infra-estrutura sira ne'ebé durante ne'e hetan estragus husi dezastres naturais ne'ebé akontese iha fulan hira liu ba.

"Iha fulan Outubru tinan 2019 iha família besik rihun 3, ne'ebé mak afetada husi insendius no anin boot ne'ebé mak akontese iha munisípiu Aileu, Ainaru, Bobonaro Ermera no Lequiça, tan ne'e, ohin verifika ona populasaun sira ne'ebé mak sai vítima Governu preve ona orsamentu hamutuk $933 Mill ka besik 934 mil hodi apoiu vítima sira", Nia deklara

Ministru ne'e salienta, atuasaun ne'ebé Governu sei fó apoiu ba vítima sira mak, sei oferese mos materiál konstrusaun ba vítima sira nune'e bele ajuda harii fila-fali uma ne'ebé antes ne'e estraga husi dezastres naturais.