Tuir informasaun ne’ebé www.tempotimor.com asesu iha pájina Primeiru Ministru, segunda (25/07) katak, Programa BDM-JF desde lansa iha loron 17 fulan-juñu, rejista ona inan isin-rua, labarik (0-6)no labarik ho defisiénsia iha Munisípiu Ainaro, Bobonaro no RAEOA hamutuk 4,254. Husi totál rejistradu ne’e, iha númeru 3,570 mak hetan ona aprovasaun sai benefisiáriu ba BDM-JF.
Ba inan isin-rua sira sei simu $15.00 kada fulan, enkuantu ba labarik husi tinan 3 mai kraik sei simu $20,00 kada fulan no suplementu adisionál ba labarik ho defisiénsia $10,00 kada fulan.
Objetivu subsídiu ne’e atu hamenus pobreza, hadi’ak saúde no nutrisaun inan no bebé nian inklui redús ra’es badak no fahe rekursu ba duni sira ne’ebé presiza tebes Estadu nia apoiu.
Totál pagamentu ba fulan-Jullu nian ho montante osan $68,105,00 ne’ebé fahe ba benefisiárius hamutuk 3570, kompostu husi benefisiárius inan isin-rua hamutuk 647 (Ainaro 154, Bobonaro 203 no RAEOA 290), benefisiárius labarik hamutuk 2917 (Ainaro 526, Bobonaro 657 no RAEOA 1,734), benefisiárius labarik ho defisiénsia hamutuk 6 (Ainaro 2, Bobonaro 1 no RAEOA 3) benefisiárius hirak ne’e mak hetan ona aprovasaun ba fulan-juñu nian no hetan pagamentu iha fulan-jullu 2022.
Pagamentu sei hala’o liuhusi konta bankária BNCTL ka karteira elektrónika T-Pay ne’ebé benefisiáriu sira nomeia ona durante sira rejista.
Ba benefisiáriu hirak ne’ebé mak seidauk iha konta bankária, programa BDM-JF sei kria konta bankária ba sira.
Primeiru Ministru, Taur Matan Ruak hatete, Governu tenke investe ba labarik sira hahu husi iha inan nia kanotak to'o moris mai nune’e ele hetan nutrisaun ne’ebé mak di’ak. (*)
