Esperansa PM Taur: La Fó Tan Pose ba PA RAEOA Foun

PM Taur Matan Ruak hatoo diskursu iha ceremonia pose PA RAEOA (12/6) PM Taur Matan Ruak hatoo diskursu iha ceremonia pose PA RAEOA (12/6) Foto Suplai

Tempotimor (Dili)-Mudansa politika ne’ebé lori mós mudansa ba lideransa iha Rejiaun Administrativu Espesial Oekusse-Ambeno (RAEOA) hamosu uitoan preokupasaun ba Primeiru Ministru Taur Matan Ruak.

Hanesan públiku hatene, iha PM Taur nia tempu, nia fó ona pose dala rua ba Prezidente Autoridade RAEOA. Pose dahuluk halo iha 13 Novembru 2019 ba José Luis Guterres, no pose daruak halo iha 12 Juñu 2020 ba Arsenio Bano.

Ho nune’e, PM Taur espera katak durante nia sei asume pasta nu’udar Xefe Governu nia sei la fó tan pose ba PA RAEO foun molok ninia mandatu remata.

"Ha'u espera enkuantu ha'u sei hanesan Primeiru Ministru (PM) labele fó tan pose ba PA RAEOA ida tan, par ida ne'e termina ninia mandatu ho di'ak," dehan PM Taur iha Palásiu Governu, Sesta (12/06).

Iha oportunidade ne’e PM Taur hatete mós katak povu Oekusse espesial tan ne’e governu sei esforsu an hodi aloka rekursu barak ba ne’ebá.

"Oekusse la'ós espesiál, populasaun mak espesiál, konstituisaun RDTL fó ida ne'e, tanba ne'e governu hotu-hotu halo esforsu hodi tau sidadaun di'ak liu iha ne'ebá, rekursu uma di'ak liu iha Oekusse, rekursu finanseiru ne'ebé nesesáriu iha Oekusse no Oekusse simu rekursu barak liu munisípiu sira seluk."

Tan ne’e, Taur husu ba komunidade Oekusse atu hamutuk ho PA RAEOA foun hodi dezenvolve di’ak liu tan Oekusse.

"Ha'u husu ba povu Atoni Oekusse atu uza no aproveita oportunidade ida ne'e atu hamutuk ho PA foun hodi dezenvolve Oekusse, tanba Oekusse iha problema barak kompara ho munisípiu seluk," katak nia.

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.