Lere Lamenta ho Resposta Xanana: Ami La’os Fundadór FRETILIN, mais Ami Funda Nasaun

Eis komandante en Xefe das FALINTIL Kay Rala Xanana Gusmao, Eis Sekretariu CDF, Mahuno, Eis Xefe Estadu Maior das FALINTIL, Taur Matan Ruak, Eis Sekretariu CDF Lu Olo no Eis Sub Xefe Estadu Maior das FALINTIL, Lere Anan Timur iha seremonia loron aniversariu veteranu Timor Leste iha 3 de Marco tinan ruma kotuk. Eis komandante en Xefe das FALINTIL Kay Rala Xanana Gusmao, Eis Sekretariu CDF, Mahuno, Eis Xefe Estadu Maior das FALINTIL, Taur Matan Ruak, Eis Sekretariu CDF Lu Olo no Eis Sub Xefe Estadu Maior das FALINTIL, Lere Anan Timur iha seremonia loron aniversariu veteranu Timor Leste iha 3 de Marco tinan ruma kotuk. Foto arkivu

Tempotimor (Dili)-Xefe Estadu Maior Jeneral FALINTIL Forsa Defeza Timor-Leste (F-FDTL) Maijor Jeneral Lere Anan Timur deklara ladun satisfas ho resposta ne’ebé Prezidente CNRT Kay Rala Xanana Gusmão fó ba karta ofisial ne’ebé nia haruka.

Foin lalais ne’e, mosu karta ida iha media sosial kona-ba resposta Xanana nian ba karta husi Maijor Jeneral Lere Anan Timur.

Iha karta ne’e Xanana hatete katak nia simu karta husi Lere iha 8 Juñu 2020, maibé nia la komprende ho di’ak karta ne’ebé Lere hakerek ho lian portugues ne’ebé aas nune’e defisil ba Xanana atu kompriende.

“Liu husi loron hirak kedas, atan-oan ha’u tenke rekoñese katak atan-oan la konsege kompriende hanoin boot no naruk no klean, husi Exelentizmu Senhor Xefe Estadu Maior Jeneral, ne’ebé hato’o iha sura ne’e, ho lian portugues ne’ebé as no defisil tebes baa tan-oan, ne’ebé lulusan SMA de’it,” dehan Xanana iha nia karta.

Liu tan Xanana dehan mós katak nia la konsidera an hanesan veteranus. Nia nunka kaer kilat no nunka tiru inimigu.

“Atan-oan ha’u ne’e see? Kaer kilat mós la hatene, nunka tiru inimigu, oho de’it lekirauk ida mós seidauk, hatene subar an de’it, halai bah alai mai iha ailaran, mai subar an fali iha Dili to’o bapa sira kaer tiha, hodi ba han-toba iha Cipinang.”

Iha ninia lia-fuan ikus, Xanana dehan, nia kbiit la to’o atu bele hakbesik an, sa tan atu habrani an hodi koalia ho lider nasional, sivil no militar ne’ebé ohin loron kaer hela destino estadu no povu Timor-Leste nia vida.

“Atan-oan kbiit mak la to’o atu bele hakbesik de’it, apalagi atu memberanikan diri atu koalia ho lider nasional, sisil no militares, ne’ebé ohin loron kaer hela destinu estadu Timor-Leste no povu Maubere no Buibere sira-nia vida,” Xanana hatete.

Ba karta resposta Xanana ne’e, Maijor Lere dehan, Xanana la fó resposta tuir sira-nia sentimentu.

"Karta ne'e liu fali husi média, ne'ebé ha'u mós hatene ona, maibé ha'u-nia maun, katuas Xanana la resposponde tuir ami-nia sentimentu," dehan Maijor Jenerál Lere ba jornalista sira iha Palásiu Governu, Sesta (12/06).

Lere rekoñese katak nia haruka duni karta, maibé la’os de’it ba Xanana maibé mós ba lider sira seluk atu oinsa bele hamutuk hodi rezolve impase politika iha rai laran.

"Ami haree ba situasaun polítika rai laran, husi governu no iha ne'ebé de'it, ami sente ladun satisfeitu, entaun ami haruka karta ne'e ba lider nasionál sira par bele tetu, dasi hamutuk par altera situasaun ida ne'e, atu rai ka husik situasaun di'ak ba jeradaun foun sira." dehan Lere.

"Karta ne'ebé ha'u haruka ba, la'ós ha'u de'it, maibé reprezenta Falintil Forsa Defeza Timor-Leste (F-FDTL) nia naran, liu-liu ofisiais Jenerais, ofesiais korneis, ami hato'o karta ne'e la'ós ba Xanana de'it, maibé ba lider istóriku sira hotu hodi hato'o ami-nia preokupasaun ba sira, mezmu ami la'ós fundadór FRETILIN no FALINTIL, maibé ami mós fundadór nasaun ida ne'e," dehan Lere.

Maske nune’e, Lere dehan, nia sei buka tempu atu ko'alia didi'ak ho Xanana, tanba Timor-Leste  harii husi isin no ran.

Rate this item
(15 votes)
Last modified on Friday, 12 June 2020 17:30
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.