PR Lu Olo Dekreta Membru Governu Foun, Armanda sa’e ba Vise PM

Tempotimor (Dili)-Prezidente Repúblika Francisco Guterres Lu Olo dekreta ona membru governu foun na’in ualu (8) hodi kompleta estrutura governu ne’ebé lidera husi Primeiru Ministru Taur Matan Ruak.

Tuir karta ne’ebé www.tempotimor.com asesu, Kinta (28/09), PR Lu Olo dekreta membru governu foun ne’e bazeia ba proposta husi PM Taur.

Entre figura hirak ne’ebé tama iha lista, iha naran “tuan” na’in rua iha governu daualu ne’ebé muda de’it sira-nia pozisaun. Fidelis Manuel Leite Magalhães husi PLP ne’ebé molok ne’e asume kargu nu’udar Ministru Reforma Lejislativa Asuntu Parlamentar sei muda ba Ministru Prezidensia Konsellu Ministru, no mudansa boot akontese ba Armanda Berta husi KHUNTO ne’ebé molok ne’e asume kargu nu’udar Ministra Solidariedade Sosial no Inkluzaun (MSSI) sa’e ba Vise Primeira Ministra.

Tuir Komunikdau Imprensa ne'ebe fo sai husi Palasiu Prezidensial informa kona ba tomada de pose ba membru governu foun sira.

"Prezidente Repúblika dekreta nomeasaun Vise Primeira-Ministra Armanda Berta dos Santos, Ministru ba Prezidénsia Konsellu Ministru Fidelis Manuel Leite Magalhāes, Ministru ba Assuntu Parlamentares no Komunikasaun Sosiál , Francisco Martins da Costa Perreira Jerónimo, Ministru Finansas Fernando Hanjam, Ministru Administrasaun Estatal Miguel Pereira de Carvalho, Ministra Saúde Odete Maria Freitas Belo, Ministru ba Assuntu Kombantentes Libertasaun Nasionál Júlio Sarmento da Costa ‘Meta Mali’, Ministru Agrikultura no Peskas Pedro dos Reis," dehan iha Komunikadu refere.

“Serimónia tomada posse ba membru foun VIII Governu na’in-8 nian sei hala’o iha Palásiu Prezidensiál Nicolau Lobato, tuku 10.”

Iha 25 maiu, Prezidente Repúblika promulga Lei Orgániku foun VIII Governu Konstitusionál. Iha Lei Orgániku foun, Primeiru Ministru sei koadjuva husi Vise Primeiru Ministru na’in-rua. Kada Vise Primeiru Ministru ida sei akumula funsaun Ministru Plano e Ordenamento no Ministru Solidariedade Sosial no Inkluzasaun.

“Ministru sira ne’ebé sei integra ba VIII Governu Konstitusionál: Ministru da Prezidénsia Konsellu Ministru, Ministru Koordenadór ba Assuntu Ekonómiku, Ministru ba Assuntu Parlamentar no Komunikasaun Sosial, Ministru Finansas, Ministru Negósiu Estranjeiru no Kooperasaun, Ministru Justisa, Ministru da Administrasaun Estatal, Ministru Saúde, Ministru Edukasaun Juventude no Desportu, Ministru Ensinu Superior, Siénsia no Kultura, Ministru Solidariedade Sosial no Inkluzasaun, Ministru ba Assuntus Kombatentes Libertasaun Nasionál, Ministru Planu no Ordenamentu, Ministru Obras Públikas, Ministru ba Transportes no Komunikasaun, Ministru Turismu, Komérsiu no Industria, Ministru Agrikultura no Peskas, Ministru Defeza, Ministru Interior, Ministru Petróleu no Minerais.”

Entretantu, molok ne’e, tuir karta konvite ida ba kandidatu ministru ida ne’ebé www.tempotimor.com asesu, Kuarta (28/05), PR Lu Olo husu ba kandidatu refere atu marka prezensa iha serimonia tomada pose ne’ebé sei hala’o iha palasiu prezidensia Nicolau Lobato, iha Sesta (29/05) tuku 10:00 oras Timor-Leste.

"Ho respeitu hodi konvida exelénsia Ministru *** par partisipa iha serimónia tomada de pose ba membru governu konstituisionál daualu, RDTL iha loron 29 Maiu 2020, iha tuku 10:00, iha Palásiu Prezidensiál Nicolau Lobato Bairro-pite," dehan PR Lu Olo liu husi ninia karta konvite ba kandidatu ministru ida.

 

VIDEO PUBLISIDADE APELU HUSI PM TAUR APLAUS BA FRONT LINE

 

 

Rate this item
(0 votes)
Last modified on Friday, 29 May 2020 12:11
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.