Tempotimor (Dili) - Mosu ipoteza barak kona-ba estabilidade VIII Governu Konstitusionál, maibé Xefe Governu konsidera kondisaun Governu atuál estavel loos, nune'e presiza atu formaliza liutan husi Parlamentu Nasional de'it.

"Ha'u hanoin governu nafatin, ajuda de'it iha Parlamentu Nasionál (PN)," dehan Primeiru Ministru, Taur Matan Ruak, iha Palásiu Prezidensiál Bairru-Pité, Kinta (7/5).

Nia afirma, ajusta de'it iha Parlamentu Nasionál hodi troka pozisaun CNRT nian ne'ebé deside halo 'traisaun' ba Aliansa Mudansa ba Progresu (AMP) iha Parlamentu Nasionál.

Maski nune'e, Governu hetan ona ema seluk ne'ebé bele troka pozisaun Partidu CNRT nian iha PN maka Partidu FRETILIN.

 

 

 

 

 

"Uluk CNRT apoiu governu, mas agora la apoiu. Entaun FRETILIN mai apoiu fali, entaun ne'e arranju polítiku ba ita de'it, mas governu nafatin la'o," nia dehan.

Antes ne'e, governu forma liuhusi aliansa AMP nian, maibe iha aprezentasaun Orsamentu Jerál Estadu tinan fiskál 2020, Partidu CNRT ne'ebé hola parte iha bloku AMP nian halo jogada, nune'e orsamentu xumba iha PN no kontinua durasaun impase polítika iha rai-laran.

Nune'e, jurista timoroan balun konsidera VIII governu konstituisionál laiha poder polítika ona hodi aprezenta tan OJE no kontinua VIII Governu to'o 2023, maibé xefe governu dehan, governu la'o nafatin to'o 2023, tanba FRETILIN viabiliza ona governu. (*)