Deskonfia Síntomas Covid-19 Iha Ema Na'in 5, Saude Manatuto 'Tahan' Estudante 41 Iha Kuarentena Featured

Mateus Vicente Correia, Diretor Servisu Saude Municipio Manatuto Mateus Vicente Correia, Diretor Servisu Saude Municipio Manatuto Foto Suplai

Tempotimor (Dili)-Estudantes Manaturto oan na'in 41 ne’ebe estuda iha Indonezia fila ona, agora daudauk tama kuarentena obrigatóriu iha Munisípiu Mantuto na'in 8 hatudu ona síntomas moras Corona Virus Disease (Covid-19), rezultadu teste nain tolu negativu no Na’in lima sei iha prosesu laran.

Diretór Servisu Saúde Munisípiu Manatuto Mateus Vicente Correia informa, Estudante na'in 41 ne'e mai husi Indonézia iha Loron 5 fulan Abril tinan 2020 no husi Ekipa Integradu Jestaun Krize simu sira hodi lori kedas mai Manatuto no ami mos simu kedas sira hodi tama kuarentena obrigatóriu iha Otél Suprise Manatuto. 

"Atu hato'o de'it katak, totál pasajeiru ne'ebe mak ami simu iha munisípiu Manatuto hamutuk 41 kompostu husi mane na'in 11 no feto na'in 30, ami simu sira iha dia 5 Abril tuku 7 kalan no lori kedas sira ba Otél Suprise atu kumpri 14 dias kuarentena, entaun 41 pesoas ne'e konsege detekta ema na'in 3 hamosu síntomas, tanba ne'e ami kontaktu ekipa nasionál primeira faze hasai na'in 3 nia sample hodi halo teste no rezultadu hatudu negativu foin dadauk kuarta ami detekta tan sira na'in 5 hatudu síntomas entaun ami konvida fila-fali ekipa nasionál mai hasai sira nia sample hodi ba halo teste, maibe até a data seidauk iha rezultadu, tanba sei prosesa hela", dehan Nia via telefone, sábadu (18/4).

Diretór ne'e afirma, Sira na'in 5 ne'e husi ekipa laboratorium nasionál hasai ona sample hodi halo teste no rezultadu dadaun ne'e sei iha hela prosesu, nune'e loloos sidadaun na'in 41 ne'e atu kompleta kuarentena iha loron segunda 20 Fulan Abril agora hodi livre ba ida-idak nia uma, maibé tanba rezultadu teste sei iha hela prosesu, tanba ne'e sei estende tan sira nia loron iha kuarentena hodi hein rezultadu, bainhura negativu mak bele husik sira livre ba uma.

"Sira 41 pesoas ne'e, sira nia loron kompleta loron 14 ne'e iha Segunda agora, mais komu sira na'in 5 (Feto hat no mane ida) nia rezultadu teste ne'e sei prosesu hela, entaun ami prolonga tan tempu hodi hein resposta mak hafoin ami bele haruka sira ba ida-idak nia Uma", tenik Nia 

Nia hatutan, dadaun ne'e Timor-oan na'in 41 ne'e, maioria estudante sira ne'ebé foin daudauk fila husi nasaun Indonézia ne'e hela hamutuk nafatin iha kuarentena obrigatóriu Otél Suprise no sira hirak ne'e hela kada ema ida iha kuartu ketak-ketak.

Rate this item
(1 Vote)
Last modified on Sunday, 19 April 2020 11:24
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.