Tuir observasaun iha terenu nota katak, ambulansia to'o iha aredores Hotel katuas tuku 11: 15 no atu tula sai fali ema nain rua iha kuarentena, maibe sira nain rua Lakohi sai husi hotel laran ba sae ambulansia, nune'e to'o oras ne'e la konsege evakua ema nain rua ne'e.

Informasaun husi pesoal Saude sira ne'ebe tama ba hotel katuas atu evakua ema nain 2 ne'ebe Pozitivu ona ba Covid-19 ne'e katak, sira nia maluk iha laran mak lakohi sira nain 2 atu evakua ba fatin Izolamentu Sentru Saude Vera Cruz.

"Sira nia ezijensia iha pontu 3, primeiru sira nain rua ne'e mak deskonfia Pozitivu, sira hasai hamutuk sira nain rua kontinua ba Izolamentu Sentru Saude Vera Cruz no sira seluk muda ba fatin seluk, segundu karik mai hasai tan sira nia sample, sira sei la fo sira nia isin, se muda sira ba fatin seluk sira prontu par kopera fo sira nia isin, ikus liu horseik atu halo evakuasaun, maibe sira dehan adianta hela de'it, entaun sira lakohi koopera ho ami, entaun la konsege evakua ba Vera Cruz, sira hakarak evakua sira dala ida de'it ba fatin seluk ida ne'e mak sira nia ezijensia", dehan pesoal Saude ne'e ba jornalista sira iha Hotel Katuas, kuarta (15/4).

Antes ne'e Timor-oan mai husi nasaun afeitadu balun hamutuk nain 8 to'o iha Batugade, depois kuandu mai Dili sira hamutuk ema nain 25 sa'e bis ida no Tama iha fatin kuarentena obrigatoriu Hotel Katuas, maibe iha sesta feira (10/4) liu ba, estudante feto ida Pozitivu Covid-19 transfer tiha ba fatin Izolamentu sentru Saude Vera Cruz, nune'e mos iha fali Segunda horseik membru SIJK Dotora Odete Viegas anunsia tan kazu foun 2 hetan Pozitivu Covid-19 transfer tiha ba fatin Izolamentu, nune'e hela nain 22 iha fatin kuarentina Otel Katuas.

Iha loron tersa 14/4, portavoz SIJK Doutor Rui Maria Araoju anunsia, kazu foun konfirmadu Timor oan nain 2 rezultadu teste laboratorium Pozitivu ba Covid-19 no transfer ona ba fatin Izolamentu sentru Saude Vera Cruz nune'e hamutuk nain 5 mak iha hela fatin izolamentu nian.