Diretora Jerál Prestasaun Saúde dra. Odete da Silva Viegas hatete, cleaner na'in tolu iha Hotel Katuas tama iha kuarentena.

Aleinde ne'e, nia dehan, iha mós pesoal saúde balun ne'ebé mós tama kuarentena tanba halo ona kontaktu ho pasiente Covid-19.

"Ema ne'ebé tama kuarentena iha Hotel Katuas la'os ema na'in 25 de'it, maibé aumenta ba 43, agora 43 ne'e mai husi cleaner na'in tolu, inklui pesoál saúde sira ne'ebé halo atendimentu ba sira ne'ebé mai husi estranjéiru no tama iha ne'ebá," dehan dra. Odete iha sala situasaun, Segunda (13/04/2020).

To'o iha Segunda, Odete hatete, mediku sira hasai ona amostra ba ema na'in 26 husi na'in 43 ne'ebé kuarentena iha Hotel Katuas.

"Ema hamutuk na'in 26 mak hasai hotu ona sample, ba sira seluk ita hein tan, tanba serbisu laboratóriu nia rekursu ne'ebé limitadu entaun ita hasai fazeadamente," dehan Odete.

Entretantu, SIJK anunsia ona katak kazu pozitivu Covid-19 iha Timor-Leste hamutuk na'in 4. Na'in ida rekopera ona, no na'in tolu seluk nu'udar kazu foun. Ema na'in tolu ne'e durante ne'e hela iha kuarentena Hotel Katuas.