"Mantém distancia social, embaixada kontinua halo akompanamentu no monitorizasaun gradualmente, liu husi meios telefone, média social e correio eletrónico ba Timor Oan hotu tantu comunidade ka estudante iha Portugal nomos Cabo-Verde," dehan Embaixadora Dra. Isabel A. Guterres liu husi karta ba www.tempotimor.com, Domingu (05/04).

Nia hatete, embaixada to'o ohin loron kontinua sensibiliza medidas prevensaun Covid-19 ba komunidade no estudante Timor-oan sira, liu husi kontaktu telefone no média sosial bazeia ba medidas no regulamentus ne'ebé fó sai ona husi Serviço Nacional de Saúde Portugal nian, liu-liu hodi kumpre medida kuarentena.

Kona-ba númeru estudante TL iha Portugal, Isabel dehan, bazeia ba dadus husi gabinete Adidu Edukasaun, total estudante timor-oan, bolseiru no laos bolseiru, iha Portugal no Cabo-Verde hamutuk na'in 260.

"Estudante sira frequenta hela estudus iha nivel oioin espalhados iha rejiaun oi-oin iha Portugal no mós Cabo-Verde", dehan nia.

Tuir nia, iha estudante Timor-oan barak mak estuda iha Portugal maibé tanba la halo inskrisaun konsular, nune'e númeru ne'ebé mensiona bele varia ho realidade.

"Embaixada planeia halo atualizasaun dadus iha tempu badak," dehan nia.

Kona-ba serbisu embaixada nian, Isabel dehan, bazeia ba orientasaun husi Ministèriu Negosiu Estranjeiru no Kooperasaun TL no bazeia ba desizaun husi governu Portugues kona-bá Deklarasaun Estadu Emerjensia ne'ebe fó sai iha 18 Marsu 2020, parte embaixada TL iha Lisboa-Portugal temporariamente aplika Regime Teletrabalho ba funsionariu Embaixada nian inklui diplomatas Timor-oan tomak ne'ebé mak hala'o hela misaun iha Embaixada no misaun Permanente ba CPLP, hodi hases an husi moras COVID-19.

Entertantu, tuir dadus worldometer ne'ebé www.tempotimor.com asesu, to'o iha Domingu (05/04) dadaun ne'e kazu Covid-19 iha Portugal hamutuk 10,524 no mate hamutuk na'in 266.