PR Lu Olo liu husi ninia deklarasaun husu ba povu Timor-Leste tomak atu kumpre estadu emerjensia no regras ne'ebé governu sei fó sai.
"Ha‘u dekreta estadu emerjénsia atu prevene kalamidade públika ida akontese ba ita, husi covid-19. Ha'u dekreta tanba konstituisaun fó dalan ba estadu emerjénsia bainhira iha kalamidade públika. Ha‘u dekreta ho autorizasaun husi Parlamentu Nasional. Ha’u halo ida ne’e ho responsabilidade tomak, nu’udar Prezidente Repúblika, atu proteje ita-nia ema no nasaun, atu la husik moras corona virus destroi ita ida-idak no ita-nia povu no nasaun," dehan PR Lú Olo iha Palásiu Prezidensiál Bairro-pite, Sesta (27/03/2020).
Xefe Estadu hatete, estadu emerjénsia Timor-Leste sei hahú iha loron 28 Marsu to'o 26 Abril 2020.
"Husi loron 28 Marsu, Sabadu, hahú husi 00.00 oras to’ o 26 Abril 2020, meia-noite, Timor-Leste tama iha estadu emerjénsia atu fó dalan ba govemu foti no implementa médida espesíflku sira. Sei limita ka suspende ita-nia direitu balun, ita-nia liberdade balun, garantia balun ne’ebé konstituisaun fó ba sidadaun ida-idak no ba hotu-hotu. La’os atu halakon, suspende ka limita atu defende interese boot liu mak povu nia vida, ita-nia vida no ita-nia familia nia vida," tenik Lú-Olo
PR Lú-Olo mós husu ba povu atu simu médida ne'ebé governu atu hala'o iha estadu emerjénsia ne'e.
"Ha'u husu ba povu tomak atu simu médida sira ne’e, ho dame, respeita no fó apoiu ba ekipa ne’ebé serbisu maka’as iha terrenu. Tanba ne'e atividade balun sei para no balun seluk sei la'o nafatin atu garante ita-nia moris loron-loron."
"Governu bele proibi reuniaun no manifestasaun ka eventu sosiál, limita sirkulasaun ema nian no saida de’it ne‘ebé envolve ema barak tanba risku kontéjiu, husi ema ba ema, boot tebes," dehan PR Lu Olo.
