"Ohin situasaun seidauk admite, tanba ne'e Prezidente Repúblika serbisu nafatin, maibé iha deit ninia rezidénsia. Aban Prezidente Repúblika tama ona atu halao ninia serbisu hanesan baibain iha palásiu. Ami tenta, esforsu atu servisu to'o kalan, atu bele halo moos", dehan Xefe Kaza Sivíl, Francisco Maria de Vasconcelos, iha Palásiu Prezidensiál, Bairru-Pité, Segunda (16/3).
Oras ne'e daudaun, ekipa ne'ebé hamoos iha área palásiu, sei halo esforsu másimu atu bele halo limpeza, nune'e aban bele remata.
Kona-ba funsionamentu iha Prezidénsia Repúblika, Xefe Kaza Sivíl dehan, la'o nafatin, sira ne'ebe serbisu hanesan oinsa mak palásiu funsiona, Gabinete Prezidente, Kaza Sivíl nian, média, balun sempre hala'o nafatin serbisu. Maibé, restu ne'ebé laiha atividade, hotuhotu mai fó apoiu hodi halo limpeza iha área palásiu nian.
Tuir nia, sasán ne'ebé hetan estragu uitoan de'it, liuliu hanesan sasán sira apoiu umanitáriu ne'ebé rai iha armajén palásiu nian hanesan foos no super-mie.
Tuir observasaun jornalista, oras ne'e ekipa bombeiru, funsionáriu palásiu PR nian, membru PNTL, seguransa sivíl, pesoál sira husi MOP, pesoál husi setór privadu HAKSOLOK, kontinua halo limpeza iha área palásiu. (*)