Deputada Bankada PLP, Maria Angelina Sarmento hateten, AMP kompostu husi Partidu CNRT, PLP no KHUNTO, hamriik bainhira Prezidente Repúblika deklara eleisaun antesipada iha 2018, nune'e AMP formalmente rejistrada iha Tribunál Rekursu nu'udar koligasaun pre-eleitorál ne'ebé prienxe rekizitu ezijénsia sira husi Lei nu 3/2004 Lei Partidu Politíku, tanba rekerimentu ida mak koligasaun ba pre-eleitorál presiza deklara liuhusi partidu ida-idak nia konferénsia no depois liu konferénsia konjuntu ne'e mak AMP hamriik. 

"Agora konferénsia ida foin lalais Partidu CNRT halo sira deklara mantein nafatin koligasaun AMP 2018 ne'e, maibé sira esklui tiha PLP. Ne'e ami nia haree laiha lójika. Ne'e desizaun unilaterál husi CNRT ho KHUNTO ne'ebé impoin atu hasai PLP husi koligasaun ida," dehan nia, iha Parlamentu Nasionál, Tersa (10/3). 

Koligasaun ne'ebé la'o iha prosesu ne'ebé naruk tebes, mai husi konjuntura polítika ne'ebé hahú kedas iha 2017 to'o eleisaun antesipada la'o hamutuk prienxe rekizitu legál. Kria akordu entre partidu tolu no too iha 2018 VIII Governu aprezenta programa no OJE 2019 to'o 2020 aprezenta tan OJE mak xumba. 

Nia hatutan, hahú kedas 2018 mai kuandu governu aprezenta programa no orsamentu rua 2018-2019 AMP sei sólidu. Tanba kaer ba kompromisu no akordu ne'ebé AMP halo katak depois tomada-de-pose iha Parlamentu transforma-aan iha maioria iha Parlamentu ne'e prontu atu kumpre konkordansia tolu hanesan, programa governu tenke pasa ba tinan 5, Orsamentu Jerál Estadu no Lei Estruturante tenke pasa. 

Nune'e, Angelina rasik konsidera PLP sei hanoin no tetu vantajen atu reklama ba Tribunál Rekursu relasiona ho PLP nia pozisaun iha AMP. 

"Ami sei haree no tetu vantajen karik PLP kontesta ba Tribunál, maibé ba ami importante liu mak oinsá koligasaun ne'e dentru prazu deve possível hakotu impase, ne'e mak ami hakarak tanba povu ida ne'e lakohi sofre beibeik," dehan nia.

Entertantu, antes ne'e, CNRT inklui partidu lima seluk hanesan PD, KHUNTO, PUDD, Frente-Mudansa no UDT hala'o ona konferénsia relasiona ho pozisaun atu kontinua AMP ida 2018, nune'e prienxe rekizitu husi Prezidente Repúblika tuir Lei Eleitorál. (*)