Sai Mediadór ba Impase Politika, Horta Hasoru Ona Xanana

Enkontru lideransa istoriku sira ho prezidente republika  iha palasiu prezidensial (10/2) Enkontru lideransa istoriku sira ho prezidente republika iha palasiu prezidensial (10/2) Foto Midia PR

Tempotimor (Dili)-Prezidente Repúblika Francisco Guterres Lu Olo fó fiar ba Laureadu Nobel da Paz, José Ramos Horta hodi sai mediadór hakotu impase politika ne'ebé Timor Leste hasoru daudauk ne'e.

PR Lu Olo foti desizaun ne'e bazeia ba rekomendasaun ne'ebé fó durante enkontru lider nasionál iha Segunda (10/02).

Hanesan públiku hatene, iha enkontru ne'ebé realiza iha Palasiu Prezidensial ne'e aleinde diskuti kona-ba dalan no alternativu tolu hodi hakotu impase politika hanesan fó oportunidade ba partidu politiku sira atu halo movimentu hodi forma governu foun, kontinua fó fiar ba Primeiru Ministru Taur Matan Ruak lidera governu to'o governu foun mosu, no Eleisaun Antesipada tenke sai rekursu ikus liu, iha enkontru refere rekomenda mós atu Ramos Horta mak sai mediadór entre lider no partidu politiku sira hodi hakotu impase politika.

Eis Prezidente Repúblika, José Ramos Horta, hafoin hasoru-malu ho PR Lu Olo, Sesta (14/02), hatete, nia sei ajuda atu buka solusaun ba problema ne'ebé iha.

"Tuir ami-nia reuniaun dia 10 liu ba ne'e hatete ha'u ajuda halo kontaktu, rona malu, hetan ideia, solusaun ba situasaun krize ne'e," dehan Horta iha palasiu prezidensial, Bairo-pite, Dili.

Horta dehan, nia sei kontinua halo kontaktu ho lider nasional no partidu politiku sira nune'e bele utrapassa lalais impasse politika.

"Ha'u pessoalmente kontinua ha'u-nia esforsu, ko'alia ho kolega lider sira, fera ulun ho ulmidade ho matenek par hetan solusaun ida di'ak ba intrese nasional," dehan Horta.

Ho esforsu balun ne'ebé nia halo, Horta dehan, foin lalais lider nasionál ne'ebé la marka prezensa iha enkontru iha 10 Fevereiru, Xanana Gusmão hasoru-malu ona ho nia iha ninia rezidensia hodi koalia relasiona ho impase politika.

Aleinde ne'e, nia dehan, iha Kinta (13/02), nia hasoru-malu ho PM Taur inklui kuadrus politiku balun.

Nia espera katak iha tempu badak sei bele koalia ho Sekretariu Jeral Partidu FRETILIN Mari Alkatiri.

"Esforsu mak kontinua nafatin, hanesan ita-boot sira hatene Prezidente (Repúblika) entrega ba partidu politiku sira par bele hetan solusaun," dehan Horta.

Ho nune'e, tuir nia, partidu politiku sira mak tenke lori solusaun ba PR Lu Olo.

"Solusaun ida di'ak liu, partidu sira hatudu sira-nia matenek hodi hetan solusaun."

Rate this item
(2 votes)
Last modified on Friday, 14 February 2020 14:19
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com