Horta 'Failla Konvense' Taur Mantein iha AMP

Eis Prezidente da republika Taur Matan Ruak rei liman husi eis Prezidente da republika, Dr. Jose Ramos Horta, iha seremonia ida iha meadus Dezembru 2019 Eis Prezidente da republika Taur Matan Ruak rei liman husi eis Prezidente da republika, Dr. Jose Ramos Horta, iha seremonia ida iha meadus Dezembru 2019 Foto Midia PM

Tempotimor (Dili)-Mediadór ba impase politika iha Timor Leste José Ramos Horta la konsege konvense Prezidente Partidu Libertasaun Popular (PLP) Taur Matan Ruak atu mantein iha koligasaun Aliansa Mudansa ba Progresu (AMP).

Horta hetan fiar husi Prezidente Repúblika Francisco Guterres Lu Olo bazeia ba rekomendasaun iha enkontru lider nasionál sira atu sai mediadór.

Hafoin hetan konfiansa, Horta hahú hala'o enkontru ho lider no partidu politiku balun hodi rona sira-nia hanoin no sira-nia pozisaun.

Tuir observasaun jornalista Tempotimor.com, iha Kinta (13/02), maizumenus tuku 6 ho balun, Ramos Horta iha ona palasiu governu hodi hein Primeiru Ministru Taur Matan Ruak.

Eis Prezidente Repúblika ne'e lori ninia ideia ida ne'ebé hakarak aprezenta ba PM Taur.

Hafoin enkontru ho Prezidente da Republika, Dr. Francisco Guterres Lu Olo iha Palasiu Prezidensial (14/2), Horta hateten sai nia idaia mak hakarak atu koligasaun AMP ne'ebé kompostu husi partidu CNRT, PLP no KHUNTO mantein sira-nia ezistensia.

Maibé ideia ne'e "xoke parede" tanba hafoin proposta Orsamentu Jeral Estadu (OJE) 2020 xumba iha Parlamentu Nasionál (PN), Primeiru Ministru Taur Matan Ruak ne'ebé mós nu'udar portavoz AMP deklara katak AMP la eziste ona.

Horta hatete, iha opsaun ka solusaun balun atu hakotu impase politika. Solusaun ida mak bloku AMP bele matein.

"Opsaun mak ne'e, AMP kontinua reorganiza, re-estrutura, konforme sira-nia hakarak, mais ida ne'e parese ke Primeiru Ministru Taur Matan Ruak la interesadu ona," dehan Horta hafoin hasoru-malu ho PR Lu Olo iha palasiu prezidensial Bairo-pite, Sesta (14/02).

Kona-ba enkontru ho PM Taur, Horta dehan de'it katak nia hakarak atu rona mós pozisaun husi PLP.

"Rona mós PLP nia pozisaun saida, tanba ita rona iha mídia katak koligasaun AMP remata tiha ona," dehan Horta.

Iha enkontru ho PM Taur, nia hatutan, koalia liu kona-ba Taur ninia knar hanesan Primeiru Ministru.

"Taur ema ida ke ho sentidu estadu, hakarak kontribui par hetan solusaun".

Maske nune'e, Horta dehan, nia seidauk iha konkluzaun ba asuntu hirak ne'ebé nia ho PM Taur koalia.

Rate this item
(5 votes)
Last modified on Friday, 14 February 2020 16:08
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.