"Ema sira ne'ebé uluk lakohi ukun-aan no agora nafatin lakohi ukun aan mas subar iha independénsia nia-laran provoka bebeik situasaun," dehan Xefe Estadu Maiór Jenerál FALINTIL-FDTL, Majór Jenerál Lere Anan Timur, iha Palásiu Prezidensiál, Kuarta (12/2).
Lere hatutan, parte seguransa hatene grupu no pesoál sira ne'ebé durante ne'e halo azitasaun liuhusi média sosiál ho liafuan mal trata ba lider sira.
Sei to’o momentu ida parte seguransa sei toma pozisaun, grupu no pesoál sira tenke responsabiliza.
"Imi tenke prepara-aan atu simu nia konsekuénsia," Lere afirma.
Kona-ba arte-marsiál ne'ebé durante ne’e provoka beibeik situasaun iha Timor, Lere dehan, governu tenke rekoñese nu'udar organizasaun desportiva.
Husu mós ba governu atu buka medida hodi komunika ho governu Indonezia atu kontrola mós arte-marsial sira husi Indonezia ne’ebé agora buras iha rai-laran.
Iha soru-mutu ho Prezidente Repúblika, Francisco Guterres Lú Olo, Jeneral Lere mós informa situasaun seguransa iha rai-laran ne'ebé la’o ho kontroladu. (*)