Vise Ministru Administrasaun Estatal e Ministru interinu, Abilio José Caetano hatete, atu estabelese polítika desentralizasaun administrativa iha munísipiu liuhusi alterasaun ida ne'e atu hametin estrutura natoon iha kada munísipiu.

"Estrutura naton ne'e, oinsa atu fo atendementu ba komunidade ou populasaun, aumesmu tempu oinsa atu hakbesik governasaun ba kraik", dehan nia, iha Palásiu Governu, Kuarta (12/2).

Governante ne'e afirma, depois alterasaun ba dekretu lei numeru 3/2006, kuandu estabelese ona podér lokál, estrutura ne'e konserteza sei implementa.

Ministru Abilio relata, antes ba estabelese podér lokál prepara ona estrutura no prienxe ho rekursu umanu ne'ebe kapasitadu hodi hein kuandu munísipiu iha ona, bele servisu hamutuk ho prezidente munísipiu eleitu. (*)