Lú Olo Hein Xanana iha Bairru-Pité

Prezidente da Republika, Dr, Francisco Guterres Lu Olo ko'alia ba Midia iha Palasiu Prezidensial (10/2) Prezidente da Republika, Dr, Francisco Guterres Lu Olo ko'alia ba Midia iha Palasiu Prezidensial (10/2) Foto Midia PR

Tempotimor (Dili) - Prezidente Repúblika, Francisco Guterres Lú Olo, la tau ba kestaun kona-ba auzénsia Kay Rala Xanana Gusmão, iha diálogu lider rezisténsia sira.

Maski nune'e, Xefe Estadu fó nafatin oportunidade bainhira Xanana Gusmão hakarak hasoru malu ho nia.

"Ha'u hanoin ohin nia (Xanana) la mai, maibé ha'u hatene katak Xanana Gusmão nia-lider boot ida, nia mos lakohi atu situasaun ida ne'e kontinua (arrasta) hodi fó terus ba nia povu. Ha'u fiar katak ohin nia la mai, maibé iha tempu seluk nia sei mai, nia dispoin nia-tempu para bele hamutuk hodi hetan solusaun ba problema," dehan Prezidente Repúblika,  Francisco Guterres Lu Olo, iha Palásiu Prezidensiál, Bairru-Pité, Segunda (10/2).

Entertantu, enkontru entre lider nasionál sira kompostu husi Eis-Primeiru Ministru, Mari Alkatiri, Eis-Prezidente Repúblika, José Ramos Horta, Xefe Estadu Maiór Jenerál FALINTIL-FDTL, Majór Jenerál Lere Anan Timur no veteranu Roque Rodrigues.

Diálogu ne'e realiza bainhira Prezidente Repúblika, Francisco Guterres Lú Olo, haruka konvite ba lider nasionál sira atu tuur hamutuk buka solusaun ne'ebé di'ak hodi hakotu impase polítika ne'ebé akontese hafoin Orsamentu Jerál Estadu (OJE) tinan fiskál 2020 xumba iha Parlamentu Nasionál.

Enkontru ne'ebé realiza hahú husi dadeer tuku 09:50 to'o 16:00 Otl. Nune'e, rezultadu pontu importante tolu hanesan, eleisaun antesipada última rekursu, partidu polítiku ne'ebé iha asentu parlamentár buka atu konvoka dialogu no mós Taur Matan Ruak Kontinua nu'udar Primeiru Ministru. (*)

Rate this item
(4 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.