Antes ne'e, iha enkontru ho Partidu Congresso Nacional Reconstrução Timor-Leste (CNRT), Prezidente partidu, Kay Rala Xanana Gusmão la marka prezensa. Tanba ne'e, Xefe Estadu 'fó tan oportunidade' atu partisipa iha enkontru iha lider istóriku nian.

Tuir planu, diálogu entre Prezidente Repúblika ho lider istóriku no personalidade sira, sei realiza ih loron 10 Fevereiru 2020, hodi rona sira-nia hanoin kona-ba situasaun polítiku-konstitusionál rai-laran.

Lider istóriku no personalidade sira ne’ebé Xefe Estadu konvida maka Eis-Prezidente Repúblika, Eis-Primeiru-Ministru, Kay Rala Xanana Gusmão, Eis-Prezidente, José Ramos Horta, Eis-Prezidente no atuál Primeiru Ministru, Taur Matan Ruak, Eis-Primeiru Ministru, Mari Alkatiri, Xefe Estadu Maiór Jenerál F-FDTL, Majór Jenerál Lere Anan Timur no veteranu Roque Rodrigues.

"Hamutuk ho lider no personalidade hirak ne’e, Xefe Estadu sei halo análize no identifika opsaun sira ne’ebé di’ak liu hodi hadi’a  situasaun polítiku-konstitusional atuál”, haktuir iha komunikadu ne'ebé www.tempotimor.com asesu, Kuarta (5/2).

Ikus liu, Xefe Estadu mós sei rona no tetu hanoin sira husi ninia órgaun konsulta - Konsellu Estadu, molok foti dezisaun relasiona ho situasaun polítiku-konstitusionál ne’ebé oras ne’e Nasaun hasoru.

Prezidente Repúblika kompromete atu nafatin hala’o diálogu hodi rona hanoin husi lider no sidadaun sira atu ita hotu hamutuk lori polítika dezenvolvimentu ba povu tomak nia bem-estar no justisa sosiál.

Ba Povu no Nasaun nia di’ak, Prezidente Repúblika sei halo esforsu hotu-hotu.

Prezidente Repúblika inisia diálogu ne'e hafoin rejeisaun Proposta Lei Orsamentu Jerál Estadu (OJE) tinan fiskál 2020, iha Parlamentu Nasionál, iha 17 Janeiru 2020. (*)