Deputadu Partidu Demokrátiku (PD), Adriano Nascimento hatete, kuandu ba tan eleisaun antesipada problema kontinua aumenta, tanba la garante partidu ida manan maioria iha eleisaun.
"Ita lakohi ko'alia ba malu agora, ba eleisaun partidu ida mai ho uitoan-uitoan pois buka malu fali, depois la fó ulun ba malu, entaun ita kala ba tan eleisaun antesipada", dehan nia, iha Parlamentu Nasionál, Sesta (31/1).
Deputadu ne'e afirma, PD nia pozisaun tenke ko'alia ba malu, tanba agora daudaun nasaun iha problema, osan laiha fó impaktu ba nasaun no povu nia moris.
"Balun dehan diálogu ne'e inkonstitusionál ou la hakerek iha konstituisaun, maibé kestaun la'os ida ne'e, atu hakerek iha konstituisaun ou lae tenke ko'alia ba malu kuandu iha problema", tenik nia.