Ameasa Virus Corona, Governu Halo Reuniaun Emerjensia

MRLAP Fidelis Magalhaes MRLAP Fidelis Magalhaes Foto arkivu

Tempotimor (Dili) - Governu Timor-Leste sei foti asaun balun relsiona ho Virus Corona ne'ebé hahú fó ameasa ba mundu.


Tuir planu, Governu sei halo enkontru, iha Kinta (27/1), tuku 15:00 hodi foti desizaun politika balun relasiona ho Virus Corona.

Ministru Reforma Lejizlativu Asuntu Parlamentar (MRLAP), Fidelis Magalhaes (Ministru Todo Asuntu versaun Bankada FRETILIN) hatete, orsida lokraik governu sei iha enkontru hodi kolia kona-ba virus corona ne'ebe dadaun ne'e besik ona mai Timor.

Virus Corona inisiu mai husi provínsia Hubei, iha Wuhan-Xina, dezde dezembru 2019, nune'e hahú espalla makaas Janeiru 2020.

Informasaun ikus liu, ema na'in 80 mak mate no na'in 2.744 maka da'et virus ne'e.

Antes ne'e, Konsellu Ministru (KM) aprova ona adezaun Regulamentu Sanitária Internasionál (RSI) atu evita moras ne'ebé espalla hela iha mundu hanesan Virus Corona.

Governu aprova ona RSI atu haforsa kapasida vizilánsia no mós atu responde ba asuntu emerjénsia sira iha saúde públiku nian.

Konsellu Ministru hasai mos rezolusaun governu ida hodi husu apoiu ba liña ministeriál, liuliu iha parte vizilánsia no atu kontrola no prevene di'ak liután moras ne'ebe ameasa ba saúde públiku rasik.

Relasiona ho estudante timoroan balun iha Xina, Governu Timor-Leste liuhusi MNEK planeia ona atu halo evakuasaun ba estudante timoroan iha Xina.

"Ami buka hela alternativa atu no ami halo ona kontaktu ho Governu Xina, atu nune'e estudante iha Xina nafatin iha Kondisaun diak", dehan Ministru Negósiu Estranjeiru no Kooperasaun (MNEK), Dionísio Babo Soares, iha Palásiu Prezidensiál, Bairru-Pité, Segunda (27/1).

Virus foun ho naran Corona Virus ne'e mosu iha Xina halo estudante timoroan tenke izola-aan iha dormitóriu hodi hadook aan husi ameasa moras ne'e.

"Estudantes sira hela de'it iha asrama, dormitóriu, labele sai, tenke taka hotu sira nia-aan para labele hetan moras," tenik nia.

Maski nune'e, nia dehan, to'o agora estudante timoroan iha Xina rasik seidauk identifika moras Corona.

Total estudante ne'ebé iha Xina kuaze estudante 170, entre 18 to'o 20 mak iha sidade Wuhan, sidade ne'ebe mosu Virus Corona.

Relasiona ho moras ne'e, autoridade Xina rasik halo ona medida preventiva taka sidade ne'ebé afetadu, nune'e halo ema hotu labele sai, labele tama, inklui estudante timoroan.

Virus Corona ne'e hahú da'et ba nasaun barak, tanba ne'e, husu atu timoroan hotu atu tuir matan-dalan ne'ebé Minusteiru Saúde hamutuk Organizadaun Mundial Saúde (OMS) fo sai, hanesan fase liman, labele kaer liman ho ema arbiru, hadook aan husi ema ne'ebé hetan influenza. (*)

 
Rate this item
(2 votes)
Last modified on Monday, 27 January 2020 15:14
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com