Diretór Ezekutivu Forum Organizasaun Naun Governamentál Timor-Leste (FONGTIL), Daniel dos Santos do Carmo hatete, problema mai husi lider polítiku sira hada'u malu osan mina-rai atu jere.
“Impase pólitika mai husi malisan rekursu osan mina-rai nian. Sira hada'u malu podér hodi jere osan, ne'e mak hamosu impase no inserteza pólitika,” dehan nia, iha Salaun São Jose Katedral, Kinta (23/1).
Nia afirma, Orsamentu Jerál Estadu (OJE) tinan fiskál 2020 la pasa iha Parlamentu Nasionál, laiha partidu pólitika ida mak hamriik deklara katak, osan la pasa ne'e tanba la tau osan ba problema povu mak vota kontra, maibé argumenta mak membru governu na'in sira (9) ne'ebe la toma pose.
Esensiál liu husi impase ne'ebé polítiku sira kria sei afeta makaas ba povu nia-vida tanba roda ekonomia paradu totál hodi aumenta númeru dezempregu iha rai laran.
Maski nune'e, espera nesesidade báziku povu nian labele falta liuliu ai-moruk no eletrisidade.