Horta husu Xanana Apoiu Netik PM Taur Fó Presaun ba Membru Governu

Eis Prezidente Kay Rala Xanana Gusmao ho Eis Prezidente Jose Ramos Horta Koalia ho ba midia Eis Prezidente Kay Rala Xanana Gusmao ho Eis Prezidente Jose Ramos Horta Koalia ho ba midia Foto Arkivu

Tempotimor (Dili)-Serbisu membru governu sira ne’ebé hanesan “tuir idaidak nia hakarak” hamosu preokupasaun husi eis Prezidente Repúblika José Ramos Horta.

Laureadu Nobel da Pas ne’e husu ba lider boot AMP, Kay Rala Xanana Gusmão, atu soe netik tempu hodi hasoru-malu ho Primeiru Ministru Taur Matan Ruak hodi bele fó apoiu.

“Ha’u hatene Maun boot Xanana okupadu tebes iha tasi mane, maibé bele hasai oras ruma pur semana (hasoru PM Taur), ha’u hanoin ne'e bele fó apoiu ba governu", dehan Horta ba jornalista sira iha Sentru Konvensaun Dili (SKD) Kinta (16/1).

Tuir Horta, Xanana ho Taur hola parte iha koligasaun AMP tan ne’e tenke haree didi’ak no tenke halo presaun ba kada ministériu hodi ezekuta orsamentu ho di’ak.

“Primeiru Ministru (Taur) ho Maun Xanana presiza rigorozu, serbisu hamutuk hodi apoiu governu no litik ministru sira par bele ezekuta sira-nia responsablidade ho di’ak”.

Bainhira serbisu hamutuk entre PM Taur ho Xanana konsege realiza, Horta hein katak iha tinan 2020 governu bele ezekuta Orsamentu Jeral Estadu (OJE) ho di’ak no ekonomia mós bele la'o di’ak.

Tanba, eis PR ne’e dehan, ezekusaun OJE 2019 la reflete ba povu-nia moris tanba governu ladun iha kapasidade ba ezekusaun.

"Orsamentu boot enves gastu ba Infraestrutura, gastu fali orsamentu boot ba buat sira seluk ne'ebé la kria empregu, hanesan gastu ba gazolina ou konbustivel no viajen sira", dehan Horta.

Bazeia ba ida ne’e, Horta dehan, ba oin PM Taur tenke haree didi’ak, bainhira ministériu ida deklara ezekuta ona OJE porsentu 80 ka 90 presiza investiga.

“Rezultadu husi 80 ou 90 porsentu mak ne'ebé loos, rezultadu mak sosa karreta, viajen ou rekruta tan asesor ka oinsa”?”.

Horta hatete, nia prefere atu ezekusaun atinze de’it porsentu 70, maibé hatudu rezultadu ne'ebé di’ak iha infraestrutura no iha kriasaun empregu.

Rate this item
(3 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com