Tempotimor (Dili) – Xefe Governu, Taur Matan Ruak dehan, nia sei la preokupa ho opiniaun barak ne'ebé fó sai kona-ba montante Orsamentu Jerál Estadu (OJE) 2020 ne'ebé bo'ot tebes. Tanba, sei iha prosesu diskusaun.
"Hau la preokupa. Tanba sei iha diskusaun iha Parlamentu. Buat hirak ne'e, opiniaun idaidak ninian. Ami haruka proposta ba, naturalmente ao longo de diskusaun mak ita hare'e. Maibé, ha'u la espekula ida ne'e," dehan Taur iha Palásiu Prezidensiál Bairru-pite, Kinta (21/11/19).
Xefe Governu ne'e mós afirma, desizaun hotu sei fó sai bainhira halo ona diskusaun. Ho nune'e, nia husu atu la presiza halo espekulasaun. Tanba, nia dehan, ida ne'e nu'udar planu Governu nian.
"Montante ne'ebé ami haruka ba Billaun $1,950. Durante diskusaun mak foin hare'e solusaun saida? Alterasaun karik, iha ne'ebé? Tanba saida? Área ida ne'ebé? Ida ne'e diskusaun iha PN," Taur esklarese.
PM Taur dehan, iha tinan ida ne'e primeira vez Governu tau osan $800 e tal mill ba seitór sosiál nian, liuliu edukasaun. Tanba tuir PM, seitór ne'e importante.
Remodelasaun
Iha okaziaun ne'e, PM Taur mós konsidera planu remodelasaun ba VIII Governu, hanesan opiniaun ida. Ne'ebé, atu realiza tenke liu husi avaliasaun ba kada membru Governu.
"Ne'e opiniaun ida. Maibé, atu ba remodelasaun tenke halo uluk avaliasaun. Tanba ne'e, ha'u seidauk ko'alia kona-ba ida ne'e," hatete Xefi Governu ne'e.
Nia esklarese, atu halo avaliasaun ne'e kompetensia tomak Primeiru Ministru nian. Tanba, tuir PM Taur, lei mak hateten nune'e.
"Avaliasaun ba membru Governu ne'e, PM mak halo. Klaru katak PM nakloke ba opiniaun no kritika hotu. Maibé iha lei hateten katak kompetensia idak-idak ninian," nia esplika.
Taur dehan, nia fiar koligasaun AMP sei metin nafatin no la'o normál.