Deklarasaun PM Kontrariu Ho Rezolusaun AMP

PM Taur Matan Ruak PM Taur Matan Ruak Foto: tempotimor.com

Tempotimor (Dili) – Hafoin hasoru Prezidente Repúblika, Kinta (21/11/19) iha Palásiu Prezidensiál Bairru-Pite, Primeiru Ministru (PM) Taur Matan Ruak deklara apoiu Prezidente Repúblika Francisco Guterres Lú Olo, atu halo diálogu para hakotu empasse polítika durante ne'e.

tempotimor.com

Maski nune'e, deklarasaun PM ne’e kontrariu ho rezolusaun Bloku Aliansa Mudansa ba Progresu (AMP) númeru 2/2019 ne’ebé hasai liuhosi Konferensia II AMP, iha Sentru Formasaun Tibar, semana liubá.

Rezolusaun ne'e deklara, AMP observa katak Membru Governu ne’ebé ladauk kompletu kontinua lori prejuizu ba implementasaun programa Governu Konstitusional Daualu. Inklui afeta ba Planu Asaun Anuál no Ezekusaun Orsamentu Anuál.

“Tan ne’e, solisita ba Primeiru Ministru, Taur Matan Ruak atu halo nafatin komunikasaun ho Prezidente Republika hodi asegura tomada de posse ba Membru Governu indijitadu sira,” hakerek iha rezolusaun ne'e.

Rezolusaun ne’e mós hasai pontu seluk ne’ebé husu ba PR Lu Olo atu justifika formalmente (ho eskrita) ninia pozisaun kona-ba membru Governu pendente.

“Bainhira Iaiha solusaun ba membru Governu indijitadu sira, AMP sei la halo diálogu ho kualkér  entidade no personalidade polítika,” hakerek deklarasaun ne'ebé deside liuhosi Konferensia AMP ba daruak ho tema “Konsolida AMP hodi Serbi Di'ak-liu  Povu” ne’e.

La'ós Atu Kesi Metin 

Liga ho rezolusaun AMP ne’e, Primeiru Ministru Taur Matan Ruak hatete, rezolusuan ne’ebé mak AMP fó sai la'ós atu kesi metin Prezidente Repúblika hodi fó pose ka lae.

"Rezolusaun AMP ne'ebé fó sai la'ós atu kesi metin PR no klaru katak PR defende ba diálogu. PR hatete ona katak dalan di’ak mak diálogu. Ha’u hanesan PM, apoiu ba diálogu ne'ebé PR fó sai hanoin par buka solusaun," dehan PM Taur.

PM Taur husu ba públiku persistensia tanbá diálogu ne'e bele akontese iha loron saida de’it no PM rasik sei foku ba membru na’in 9 ne'ebé seidauk simu pose.

"Sei la realiza ohin ne'e, aban mós bele realiza. Sei lae bainrua. Ne'ebé ita persistensia. Ha’u-nia atensaun primeiru mak oinsá membru Governu ne'ebé seidauk tomada pose bele tomada pose," Taur afirma.

Rate this item
(2 votes)
Last modified on Thursday, 21 November 2019 15:16
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com