Tanba, TIC TIMOR hanesan Instituisaun Públika hari’i iha VI Governu Konstitusional liuhosi Dekretu-Lei no.29/2017 iha 02 Agostu 2017 no tutela ba Premeiru-Ministru, ho ninia kompeténsia sira atu implementa estratéjia polítika téknolojia informasaun no komunikasaun, jere rede jnformátika Governu no orgaun estadu nian.

Diretór Ezekutivu TIC TIMOR I.P, Roberto Caitano de Sousa Vicente hatete, atividade asina ne’e hanesan marka pasu foun iha esforsu atu alkansa Programa Oitavu Governu (VIII Governu) ba Governu Eletróniku (E-Government).

“Liuhosi servisu hamutuk ida-ne’e, IPG mós sei kontribui ba esforsu TIC TIMOR I.P nia servisu hodi hamenus gastu lanesesáriu sira iha área informatika, sentraliza no asegura dokumentu no informasaun iha sentru-dadus Governu”, dehan Diretór Ezekutivu TIC Timor, Roberto iha edifísiu IPG, Delta, segunda (19/12).

Tanba, TIC TIMOR intende papel importante Institutu Petróleu no Jeolozia (IPG-sigla portugés) nian, hanesan institutu públiku ne’ebé estabelese liuhosi Dekretu Lei Nu. 33/2012, razaun ne’e kooperasaun servisu téknolojia, informasaun no komunikasaun (TIC) importante tebes ba papel IPG nian, tanba TIC bele dezenvolve tuir nesesidade IPG nian iha kurtu, mediu no longu prazu hodi fasilita di’ak liután prestasaun servisu kona-ba responsável ba setor petrolíferu no rekursu minerais, enjeñeria, planeamentu no jestaun ambiental nian iha rai laran.

Ajensia TIC TIMOR bele transforma servisu IPG nian ne’ebé iha agora mais elektróniku, liuhusi utilizasaun servisu téknolojia, informasaun no komunikasaun.

Nune’e, hato'o mós agradesimentu ba estrutura IPG tomak, tanba fó ona konfiansa ba TIC TIMOR hodi apoíu servisu ne'ebé ligadu ho téknolojia.

“Ha’u hato'o obrigadu barak ba, Institutu Petróleu no Jeologia (IPG, I.P.), nia konfiasa no fiar mai ami hanesan tékniku timoroan, ne’ebé iha ona kuñesimentu ne’ebé di’ak tebes hodi fornese solusaun informatika ba ita-boot sira. Prezidente no tékniku sira husi IPG nian ne’ebé hahú ona kolaborasaun di’ak tebes, nune’e bele hahú marka pasu foun ne’e hodi la’o ba futuru ho kualidade liuhosi dalan governu-elektróniku”, nia agradese.

Fatin hanesan Prezidente IPG, Gabriel Gaspar Aparício de Oliveira mós agradese tebes ho apoíu ne'ebé TIC Timor fó, tanba nesesidade servisu IPG nian presiza tebes téknolojia.

“Apoíu hosi TIC ne’e di’ak tebes ba nesesidade IPG nia, progresu servisu ami sempre preokupa ho dadus, tanba ne’e ami hakarak tebes integradu iha fatin ida”, nia dehan.

Asina nota entendimentu ne'e fahe ba komponente ha'at (4) hanesan, ‘Internet Protocol Address’ ho ninia rekezitus nesesáriu hodi estabelese enderesu sistema portal web application, ‘Internet Protocol Address’ hodi estabelese enderesu ba sistema Jestaun Rekursu Umanu no Patrimóniu sira, Estabelesimentu servisu ba Ekipamentu Seismometer IPG nian, no Sistema aplikasaun no servisu konetividade nesesáriu sira-seluk ne’ebé presiza atu dezenvolve no fornese iha futuru. (*)