"Ha'u seidauk promulga buat ida, ha'u kontra hanesan desimu terseiru mes ba asesor, sira ne'e manan osan boot, mais entretantu ha'u sei halo konsulta ho governu no Maun Xanana", dehan Horta iha sala VIP aeroportu internasional Prezidente Nicolau Lobatu, tersa (13/12).
Tanba, xefe estadu iha konkluzaun ida katak, Timor-Leste dadaun iha hela situasaun defisil liliu enfrenta covid-19 no funu entre Ukraina ho Rusia, entaun governu tenke haree apoiu ba ki'ak sira.
Nune'e, salariu désimu terseiru ne'ebe governu atribui labele fo ba hotu-hotu, maibé di’ak liu governu fo ba sira ne'ebe ki'ak liu ka manán rendimentu menus.
Alende ne’e, ko'alia kona-ba atu atribui ba asesór estranjeiru, tuir Lei traballu iha rai hotu-hotu, lolos labele diskrimina ninia servisu fatin, depois sidadaun estranjeiru ne'e iha Timor-Leste, sira-nia despeza barak liután, tanba sira mai servisu aluga uma sempre karun, ida-ne'e presiza haree atu hetan ekilibru ida.
"Aleinde halo tiha konsulta, rona mos governu, desizaun ne'ebe governu hasai ne'e, la'os perfeitu, maibé akomoda interese hotu-hotu eh halo justisa ba hotu-hotu", nia afirma.
Maibé, hafoin rona no simu komunikasaun husi Prezidente Repúblika, José Ramos Horta, Konsellu Ministru hala’o kedas sorumutu iha loron 12 fulan-dezembru tinan 2022 hodi halo alterasaun, ne’ebé mantein nafatin ein jerál diploma inisiál husi loron 9 fulan-novembru kona-ba pagamentu estraordináriu ba saláriu adisionál fulan ida nian ho prinsipiu universalidade no aumenta tan ho kontratadu sira hotu, la haree ba nasionál ka internasionál.
Valór pagamentu estraordináriu ekivale ba valór saláriu mensál benefisiáriu nian ba fulan-dezembru tinan 2022, maibé hodi uniformiza valór pagamentu estraordináriu entre traballadór sira iha Administrasaun Públika, sei estabelese limite tuir ekiparasaun ba regime jerál.
Nune’e, pagamentu ba traballadór sira Administrasaun Públika nian, nasionál ka estranjeiru, ne’e limitadu ba valór grau no eskalaun másimu tabela salariál kareira rejime jerál nian ka ba valor vensimentu ba ajente administrasaun públika ne’ebé kontrata ba ezersisiu kargu diretór-jerál nian. (*)
