Xefe Kaza Militár Interinu Prezidénsia Repúblika, Maijór Francisco da Silva, apela ba sidadaun sira ne’ebé laiha dokumentu, maibé hakarak la'o ilegal, di’ak liu labele ba, tanba parte autoridade sira sei la autoriza.
"Husu ba maluk sira, se mak laiha dokumentu legal ruma, nia sei la sai iha 27 agora. Ha'u nia maluk sira sei uza lei hapara sidadaun ne'ebé atu sai ba liur iha dia 27 agora ne'e, tanba enkontru ida ohin atu haree ba situasaun ida agora, hahú dia 27 agora ba oin," dehan nia iha palasiu prezidensial, kuarta (19/10).
Tuir lei servisu nasional seguransa ninian iha artigu 21, Prezidente Repúblika hanesan aman ba nasaun, nia iha dever atu kontrola entidade seguransa nian.
Tanba ne'e, ho ezekusuan atuasaun ba iha loron 27 fulan-outubru, maka kaza militar prezidente repúblika konvida ona entidade estadu nian hodi haree ba iha situasaun ida-ne'e.
Tanba, enkontru ne'e deside liuhusi reuniaun entre kaza militar prezidensiál ho autoridade Polísia Nasionál Timor Leste (PNTL), Polísia Sientifika Investigasaun Kriminál (PSIK), Serbisu Nasionál Intelijénsia (SNI), FALINTIL Forsa Defeza Timor-Leste (F-FDTL), Servisu Rejistu Verifikasaun Emprezariál (SERVE), inklui Komissaun Autoridade kona-bá Tráfiku Humanu.
Parte autoridade seguransa rasik mos hala'o ona kontaktu ho autoridade no servisu Migrasaun sira iha Portugal atu hein iha odamatan entrada atu husu tuir didiak sidadaun sira molok tama iha Portugal.
Meiu ida-ne'e, atu motiva sidadaun ne'ebe atu sai ba estranjeiru tenke ho legal, nia atu sai privadu mos sé mak simu no responsbiliza ba nia atu ba servisu, nia tenke sai ho pasaporte ho durasaun husi fulan 6 ba leten.
Tanba, haree ba preokupasaun situasaun sidadaun timoroan agora iha nasaun Alemaña, Abudabi Malazia inklui Portugal, sai abandonadu tebes, ho ida ne'e Prezidente Repúblika preokupa loos hodi konvida membru reuniaun Konsellu Defeza Seguransa nian, atu buka solusaun ba situasaun sidadaun timoroan iha estranjeiru.
Nune’e, parte autoridade sira mos simu ona informasaun katak, traballador kuaze 200-resin mak sei sai ba estranjeiru iha loron 27 outubru 2022.
Maibé, parte kaza militar konvida entidade estadu seguransa nian, ne’ebé foti ona desizaun atu bandu sidadaun 200-resin atu aranka ba estranjeiru ho illegal iha loron 27 fulan- outubru tinan 2022. (*)
