"Medida hirak ne’e, atu loke dalan ba governu hodi iha dalan legál atu aloka rekursu sira nesesáriu fó ba timoroan sira ne’ebé infrenta situasaun susar sira ne’ebé la previstu.  Exemplu hanesan sira ne’ebé vistu ba tráfiku ema nian, sira ne’ebé vítima ba dezastre naturál atu repatria mai. Hirak ne’e presiza enkuadramentu legál sira fó dalan ba Governu atu halo alokasaun rekursu,” dehan Ministru Prezidénsia Konsellu Ministru, Fidelis Leite Magalhães iha Palásiu Governu, Kuarta (19/10).

Dekretu Lei ne’e prevee medida 6 ba protesaun timoroan iha rai-liur no define regra sira ba ninia atribuisaun, hanesan, prestasaun sokorru iha kazu katástrofe naturál ka perturbasaun grave ba orden públika, repatriasaun (lori-fila) timoroan sira iha rai-liur, apoiu emerjénsia ba alojamentu, apoiu ai-han emerjénsia no apoiu ba kazu prizaun ka detensaun.

Governu aprova dekretu-lei ne’e, atu bele halo atuasaun lalais ba timoroan sira ne’ebé terus hela iha ema nia-rain.

“Nune’e, dekretu-lei ne’e aprovadu ona hanaran medida ba protesaun timoroan sira iha rai-li’ur," nia dehan

Tanba ne’e, iha prinsípiu ida ne’ebé presiza respeita mak igualdade, nune’e hakerek lei no dekretu-lei ida sei la temi atu apoia de’it timoroan sira iha nasaun ida, maibé ba nasaun hotu ne’ebé timoroan sira hela ba no sei regula tuir regulamentu ne’ebé sei hatu’ur tuir klasifikasaun.

“Dekretu-lei ne’e la temi de’it ba timoroan sira iha Portugál, maibé ne’e hanesan baze legál ida ba atuasaun governu nian iha fatin hotu." (*)