"Iha buat rua, ida se bele karik Governu di'ak liu fo de'it ba komunidade ne'ebe empregu laiha ou sira-nia vencimentu ne'e ki'ik loos, ne'e solusaun ida, eh solusaun seluk ita idaidak ho ita-nia konsiensia osan ne'e ita fó ba sira ne'ebé osan laiha," dehan Horta iha sala VIP, Aeroportu Internasional Prezidente Nicolao dos Reis Lobato Comoro, kinta (29/09).

Tanba, subsidiu ne'ebé fahe ba populasaun iha fim do ano ne'e, hanesan prezente natal no tinan foun ida ba sira, tanba ne'e hothotu tenke ho konsiensia.

Iha mandatu Prezidénsia mos Xefe estar halo polítika ida-ne'e, aloka nia vensimentu pursentu 50 ba Fundu espesial ida ne'ebé hodi fó apoiu ba individu no organizasaun balun ne'ebé tau matan ba ema ki'ak sira.

"Hahu kedas iha Junu, seidauk fó osan ne'e, akumula hela to'o novembru ho dezembru mak entrega, eh ne'e la'os primeira vez. Nune'e mos perdiem ne'ebé ha'u simu, perdiem balun ha'u la Gasta, tanba Governu sira selu ha'u nia Otél eh balun gasta duni, hanesan Nova Iorke laiha Governu ida mak selu, maibé iha fatin balun nein doit metan ida ha'u gasta, maibé iha diretu ba perdiem ne'e mós ha'u entrega ba Fundu espesial ida iha Prezidensiál para depois fahe ba individual ou Organizasaun ruma ke servisu di'ak tau matan ba kiak sira," Horta afirma.

Tanba ne'e, konvida entidade hothotu halo tuir ezemplu sira ne'e, karik iha ajente Estadu balun ne'ebé manan salariu husi rihun ida ba leten, di'ak liu fó tiha osan 200 dólar ne'e sai hanesan kontribuisaun natal ba ema ki'ak sira.

"Mais di'ak liu hanesan ne'e halo desizaun polítika di'ak ida para hanesan primeiru ajuda espesial ne'ebé governu fo iha 2020 ne'e ba de'it sira ne'ebe manan de 500 dólar, ida-ne'e mak di'ak liu," nia afirma. (*)