Login to your account

Username *
Password *
Remember Me

PR Horta ho Ekipa Delegasaun To'o Hikas Ona iha Dili

Prezidente Repúblika (PR), José Ramos Horta hafoin to'o iha Aeroportu Internasional Nicolao Lobato. Prezidente Repúblika (PR), José Ramos Horta hafoin to'o iha Aeroportu Internasional Nicolao Lobato. Foto Suplay

Tempotimor (Dili)-Prezidente Repúblika (PR), José Ramos Horta ho ekipa Delegasaun ne'ebé mak ba hala'o vizita estadu durante semana-ida ba Repúblika Indonézia, iha loron segunda (25/07) ohin, to'o hikas ona iha Timor-Leste.

“Ajenda Prezidente Repúblika, José Ramos-Horta. Loron, segunda, 25 Jullu 2022. Oras 12:30, Prezidente Repúblika, José Ramos-Horta, ho delegasaun fila hikas ona mai Timor-Leste hafoin halo vizita estadu ba Repúblika Indonézia durante semana ida, iha Aeroportu Internasionál Prezidente Nicolau Lobato Comoro, Dili”, ajenda ne'ebé www.tempotimor.com, asesu husi Gabinete Prezidente Repúblika, segunda (25/07).

Nune'e tuir ajenda, Primeiru Ministru (PM), Taur Matan Ruak, ho ninia Membru Governu balun mós desloka ba marka prezensa iha Aeroportu Internasional Prezidente Nicolao Lobato Dili, atu simu Prezidenté Repúblika ne'ebé mak fila husi ninia vizita iha Aeroportu Dili.

Prezidente Repúblika, José Ramos Horta ho delegasaun to'o iha fatin, sei iha Komferénsia Imprensa ida ne'ebé sei halo direta husi Prezidente Repúblika, atu deklara ba públiku kona-ba atividade vizita estadu durante semana ida iha sala VIP Aeroportu Dili.

Iha loron segunda 18 Jullu 2022, Prezidente Repúblika, José Ramos-Horta, segunda kalan, oras 21:00, to’o iha Jakarta hodi halo Vizita Estadu, iha Aeroporto Soekarno-Hatta, Xefe Estadu ne’ebé akompãna husi Ministra Negósiu Estranjeiru, Adalgiza Magno, Ministru Agrikultura no Peskas, Pedro Reis no Embaixadór Timor-Leste ba Indonézia, Filomeno Aleixo, simu husi Ministru Obras Públikas Indonézia, Basuki Hadimuljono.

Iha loron tersa (19/07), Prezidente Repúblika, José Ramos Horta simu husi nia omólogu, Joko Widodo, hodi ko’alia kona-ba relasaun bilaterál entre nasaun rua no tuir mai sei hasoru malu ho eis Prezidente Repúblika Indonézia, Susilo Bambang Yudhoyono.

Prezidente José Ramos Horta mós halo enkontru ho dirijente sira husi Universidade Indonézia (UI), hodi ko’alia kona-ba kooperasaun sira iha setór edukasaun no kalan, jantar konfraternizasaun hamutuk ho intelektual no jornalista sira Indonézia nian.

Iha kuarta (20/07) Prezidente Repúblika hasoru malu ho Koordenadór Organizasaun Islámika Nahdatul Ulama no sei vizita mós edifísiu “Pusat Dakwa Muhammadiyah”.

Nune'e iha parte lokraik, Xefe Estadu vizita mós “Universidade Islam Negeri Jakarta” (UINa), nomós atende entrevista iha Kompas Tv no Metro Tv, hodi ko’alia kona-ba relasaun Timor-Leste ho Indonézia, ho ASEAN nomós situasaun jerál polítika iha rai-laran.

Iha vizita loron kinta (21/07) Prezidente Repúblika José Ramos Horta hasoru malu mós ho responsável sira hosi Universidade Katólika Indonézia no iha 22 Jullu, Xefe Estadu hasoru malu ho Diplomata Indonézia, Dino Pati Djalal no termina vizita iha Kupaun, Nusa Tengara Timur, liuhusi sorumutuk ho Governadór Viktor Bungtilu Laiskodat. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com
Darwin_Optic

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com

Kalendariu Arkivu

« November 2022 »
Mon Tue Wed Thu Fri Sat Sun
  1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30        

Tempo Timor Networks

Online Counter