“Di'ak ba dahuluk, agradese ba populasaun iha Suku Bobometo, ne'ebé simu ami iha fatin ida-ne'e, ho amu paraku, ami mai iha ne'e, iha programa oitavu Governu nian ne'ebé lidera husi ita-nia aman Jenerál Taur Matan Ruak, hanesan Primeiru Ministru”, dehan Ministru Francisco liuhusi diálogu ne'ebé hala'o iha Parokia-Bobometo, Sub-rejiaun Oesilo, kuarta (20/07).

Ba diálogu ne'ebé iha, ne'e nu’udar programa husi Ministériu Asuntu Parlamentár no Komunikasaun Sosiál nian, ne'ebé importante tebtebes Governu iha komunidade nia let ho nia atividade naroman ba Suku.

Iha implementasaun programa ne'e mós la'ós MAPKOMS mesak maibé hetan akompaña mós husi Sekretáriu Estadu ba Asuntu Veteranu (SEAV) ho ninia Konsellu Veteranu sira, nomós Prezidente Autoridade Rejiaun Administrativa Espesiál Oekussi Ambeno (RAEOA), Arsenio Bano, reprezentante husi Ministériu Agrikultura no Peska (MAP) inklui Prezidente INFORDEPE, ne'ebé mak ko'alia kona-ba programa prioridade sira husi governu daualu nian.

Tuir observasaun www.tempotimor.com iha terenu nota katak, antes hakat ba ajenda diálogu, MAPKOMS deside hala'o mós vizita kortejia ba Konstrusaun Postu Intergradu Unidade Patrollamentu Fronteira (UPF) iha aldeia Kibiselu, inklui vizita kondisaun Postu Saúde iha aldeia Tumin, no Perfurasaun Bee iha aldeia Noel-Ekat, nomós estrada rurál sira iha Suku Bobometo, Sub-Rejiaun Oesilo. (*)