“Akordu ida-ne’e ho objetivu atu halo kontratasaun empréstimu ida ho valór besik dolar amerikanu millaun 121, ho períodu maturidade tinan 40, hodi finansia projetu fornesimentu bee iha Dili”, dehan Ministru Prezidensia Konsellu Ministru (KM), Fidelis Manuel Leite Magalhães, iha Palásiu Governu, kuarta (20/07).
Programa ne’e sei dezenvolve liuhusi finansiamentu ho durasaun tinan hitu no komponente tolu, ba komponente dahuluk refere ba dezenvolvimentu infraestrutura sira abastesimentu bee nian, komponente daruak nian kona-ba hadi’a kapasidade institusionál servisu sira ba setór ida-ne’e no datoluk hadi’a jestaun projetu sira.
Nune'e Governu espera investimentu ne'e sei fó benifisiu ba sidadaun tomak iha kapitál Timor-Leste nia.
“Agora ida-ne'e ita tenke foku lai ba Dili, tanba Dili mak ema konsentrasaun populasaun barak liu, la’ós la investe iha Munisípiu sira, munisípiu sira sei investe hotu maibé agora ita foku uluk ba Munisípiu Dili tanba Dili mak kapitál Timor-Leste nia ne'ebé konsentrasaun populasaun barak liu”, afirma nia. (*)
