"Tinan-ida ne'e halo lansamentu ba Munisípiu 5, Ermera, Bobonaru, Lautém, Baukau ho Vikeke, Baukau ohin, Vikeke sei semana oin mai," dehan Ministru Planu no Ordenamentu (MPO), José Maria dos Reis, iha Sentru Konvensõens Baukau (CCB-sigla portugés) vila antiga, kuarta (20/07).
Lansamentu importante, tanba atu simu povu nia vizaun ba dezenvolvimentu Munisípiu Baukau nian iha futuru.
Nune'e, liuhusi konsultasaun konjuta ba matenek na'in, liana'in, funsionáriu no Autoridade Suku no Postu sira atu sai reprezentante povu hodi elabora fatin potensiallidade agrikultura, turizmu, fatin risku dezastre natural no fatin espasu Munisípiu nian, ba modelu ordenamentu Munisípiu nian.
"Ita atu halo industria karik, tau iha fatin ne'ebé loos, para labele estraga fali ambiente seluk,” nia fó ezemplu
Tanba ne'e, instrumentu ordenamentu atu orienta halo supervizaun ba futuru halo dezenvolvimentu tuir regras planu ordenamentu nian.
"Wainhira hetan ona planu urbana sidade ne'e ema na'in hira mak hela, tanba ema hela tán, aumenta bee, eletrisidade, halo luan estrada, entaun ita prevene ona, populasaun aban bainrua hela oinsá, ita tenke hatene, karreta hira mak sei aumenta tán iha Baukau, buat sira ne'e tenke iha," nia esplika
Tuir planu, konsultasaun husi ékipa konjuta sira iha Munisípiu 5 ne'ebé hahú ona lansamentu sei finaliza tinan-oin no sei halo transformsaun ba dekretu lei hodi aprezenta ba Konsellu Ministru (KM) atu sai instrumentu reguladóra ba prosesu dezenvolvimentu.
Sekretáriu Munisípal Baukau, Simão Marques pineiro, hatutan, lansamentu ne’e importante tebes, tanba ne’e, parte Munisípiu estabelese gropu traballu hodi responde ba polítika MPO nian.
"Ita konsidera importante, tanba ho planu hotu-hotu ne'ebé halo laiha liña orientadór atu orienta ita nia dezenvolvimentu, tanba tinan-ida rua mai halo ida sobu fali, tanba ne'e tenke halo hodi responde ba asaun ne'ebé tuir mai," nia argumenta
Enkuantu grupu traballu ne'ebé Autoridade Munisípal Baukau prepara, kompostu husi diresaun ajénsia planeamentu Munisípal, inklui doretóres tenkníku sira no hetan akomapañamentu husi peritu internasionál balun.
Gropu ne'e, sei halo identifikasaun ba fatin sira iha Munisípiu Baukau, hanesan lixu fatin, fatin potensiallidade agrikultura, turizmu no seluk tán hodi ajusta ba planu implementa lei poder lokál no dezentralizasaun admintrativa.
Entretantu partisipa iha lansamentu ne'e, Autoridade Postu Administrativu 6 ho Xefe Suku 59 inklui doretóres servisu balun iha Munisípiu Baukau. (*)
