“Ha'u mós sei haree fazeadamente filafali ba oin halo nusa mak bele ajuda tán para sira bele halo buat ruma iha Rádiu komunidade ida-ne’e”, dehan Ministru Francisco hafoin hala'o vizita Rádiu Komunidade Atoni Lifau, (RKAL) iha Rejiaun Administrativa Espesiál Oekussi Ambeno (RAEOA), tersa (19/07).

Tanba vizita kortezia ne'ebé hala'o husi MAPKOMS ba rádiu komunidade Atoni Lifau ne'e atu haree kona-ba problema no difikuldade ne'ebé Rádiu ne'e enfrenta liliu mós haree apoiu ne'ebé mak durante ne'e Governu fó ba sira, halo saida ona.

Maibé apoiu orsamentu ne'ebé mak MAPKomS fó ba RKAL hamutuk rihun $3 ne'e konsege halo duni reabilitasaun ba edifísiu ida nomós sala enkontru nian hodi utiliza ba hala’o serbisu ho di’ak.

Pozisaun MAPKOMS nafatin hanoin atu apoiu ba saida mak presiza halo iha Rádiu refere, maibé importante jestór ho nia estrutura iha rádiu refere tenke hatudu sira-nia kreatividade jere servisu ho di'ak.

Jestór Rádiu Komunidade Atoni Lifau, José Francisco Efi hatete, sira sente orgullu ho Ministru Asuntu Parlamentár no Komunikasaun Sosiál tanba foin ba dahuluk hala'o vizita espesiál hodi ba haree direta problema no preokupasaun sira ne'ebé mak afeta ba Rádiu Komunidade Atoni Lifau.

“Ami sente orgullu tanba foin primeira vez ami hetan vizita husi Ministru Asuntu Parlamentár no Komunikasaun Sosiál, ne'ebé hakarak haree Rádiu sira iha teritóriu inklui espesialmente Rádiu Komunidade Atoni Lifau, entaun ami sente orgullu”, afirma nia.

Ho ida-ne'e, husu ba MAPKOMS atubele fó oportunidade nafatin hadi'a situasaun Rádiu sira liliu  sistema Komunikasaun sira iha média liliu iha área jornalizmu.

“Ohin ami rekomenda tiha ona ba esélensia Ministru atu haree situasaun sira ne'ebé mak dadaun ne'e ami hasoru, hanesan frekuénsia ne'ebé mak dadaun la kobre suku sira hotu. Tanba ne'e ami mós hetan ona resposta husi ekipa tékniku katak semana oin ami halo pedidu ida para tékniku sira bele mai vizita e hadi'a ami-nia ekipamentu sira ne'ebé mak agora dadauk avaria”, dehan nia. (*)