“Ne'e mak hanesan ohin ha'u dehan FRETILIN tenke manán iha 2023. ha'u tenke okupa fatin-ruma iha FRETILIN atu Lori FRETILIN ba oin, para hako'ak líder sira hothotu e liliu FRETILIN tenke hako'ak mós CNRT, tanba Xanana iha ne'ebá. ne'e mak ha'u hanoin FRETILIN tenke ukun, sé la'ós maioria absoluta, tenke ukun ho CNRT”, dehan nia hafoin audénsia ho Prezidente Repúblika (PR), José Ramos Horta iha Palásiu Prezidensiál, Bairo Pite, kinta (14/07).
Tanba hari’i partidu ne'e atu ukun, no partidu boot labele depende maka’as ba partidu ki'ik sira maibé partidu ki'ik mak tenke depende ba partidu boot.
“Sé boot mak nafatin depende fali ki'ik, ha'u hanoin ita luta ba ida-idak nia kadeira e luta ba ida-idak nia moris, mais ita la luta ba moris di'ak povu ninian, ne'e mak ha'u-nia esforsu”, dehan nia.
Tanba, Fretilin rasik ho Xanana inklui Prezidente Repúblika, José Ramos Horta iha devér no morál atu rezolve problema sira ne'ebé mosu, liliu kona-ba joven sira ne'ebé nadodon ba rai-liur.
Bainhira líder sira lakohi hamutuk atu rezolve problema ida-ne'e, mak neneik-neneik joven sira halai hotu ba rai liur, no hela katuas de'it mak iha-ne'e.
“Ohin loron ita ba suku, katuas de'it mak nakonu iha ne'ebá, joven sira hothotu iha Dili, neneik Dili joven sira laiha, katuas de'it mak nakonu fali iha Dili mós iha, e Xina, Indonézia, Austrália sira mak nakonu fali iha Dili mós iha”, deklara Lere.
Maske, ema bele gosta ka la gosta ba nia deklarasaun sira ne'e maibé ne'e mak realidade tanba iha sentidu ba estadu.
“Kongressu FRETILIN besik ona iha 8 setembru. Ha'u seidauk deside ha'u sei forma ka la forma pakote ne'e seidauk deside, mais ha'u-nia ambisaun no interese hakarak serví Partidu FRETILIN”, hatete nia.
Tanba Fretilin ne'e la'ós kualker partidu, Mari Alkatiri, Lere Anan Timur no Francisco Guteres ‘Lu Olo’ atu iha ka laiha mós FRETILIN iha nafatin, tanba FRETILIN ne'e lulik.
“Até agora ha'u seidauk iha pozisaun, ha'u estuda hela situasaun iha partidu laran tanba ha'u seidauk abitua ho situasaun polítika ida hanesan ne'e”, hatete nia.
Dadauk Lere rasik mós sei estuda hela situasaun sira tanba iha reuniaun Komisaun Sentrál Fretilin foin lalais iha Canosa haree katak podia diskute kestaun estratéjiku sira kona-ba tanba saida mak FRETILIN manán lá ukun, sé ukun karik to'o iha klaran, ida-ne'e mak kestaun maibé la tau ida-ne'e ba kestaun no diskute fali kestaun ba nivél delegadu no nivél aldeia sira.
“Ha'u mós foin mak ba ne'ebé, ha'u lá domina situasaun, ha'u labele nara-naran intervein arbiru de'it, agora ita hatete Lú Olo manán ba Prezidente tanba katuas Xanana apoia, sé laiha karik mós lakon nafatin, mais sira dalaruma nega, dehan Xanana laiha mós manán nafatin, ha'u dehan ok ne'e obrigadu ba maromak. Ne'ebé ha'u hanoin katak tanba saida ne'e ninia hun mak ne'e”, afirma nia. (*)
