“En relasaun ho foer iha Dili-laran ha'u hanoin ne'e, hanesan ha'u dehan ona dala ida iha ne'e katak ne'e kompeténsia Prezidente Autoridade Munisipál Dili, sira mak tenke tau matan ba, halo nusa mak raut lixu ka foer sira ne'e. Eh ami haruka ona karta ba nia, atu haree”, dehan nia iha Plenária PN, tersa (12/07).

Tanba dala barak públiku sempre nota karreta sira ne'ebé mak tula foer ba Tibar sempre hamonu foer iha dalan ibun sira komesa husi Komoro ba Tasitolu to'o iha Tibar.

“Semana-semana ita hamoos husi Tasitolu mai, maibé ita-nia maluk sira lori fali foer ba monu filafali e foer nafatin, ne'e mak ha'u hanoin ida-ne'e ami sei koordena di'ak ho señora Prezidente Autoridade para rezolve problema ne'e, atu nune'e labele tán akontese iha tempu futuru”, afirma nia.

Nune'e karta ne'ebé haruka ba autoridade munisípiu Dili, atubele fó atensaun ba karreta sira tula foer ne'e, tenke uza lona taka iha karreta leten, atubele asegura foer labele monu estraga wainhira hala'o viajen husi Dili ba Tibar.

“Liliu mós ba sira ne'ebé mak servisu tenke asegura sira, ho roupa seguransa ninian ou luvas buat sira ne'e hotu para sira bele servisu ho di'ak”, dehan nia. (*)