Tuir komunikadu imprensa ne’ebé www.tempotimor.com asesu iha loron kinta (07/07) katak, Manuál ida-ne’e kria liuhusi finansiamentu Uniaun Europeia ba inisiativa “Asegura Responsabilidade Governu nian ba KOVID-19 no promove Liberdade Asesu ba Informasaun iha Timor-Leste”, projetu tinan rua (2020-2022), implementa husi CEPAD.
Manuálrefere ho objetivu atu fasilita sidadaun sira hodi asesu ba informasaun, ne’ebé rai iha instituisaun estadu nu’udar sira-nian direitu konstitusionál ba informasaun.
Ida-ne’e objetivu prinsipál husi projetu ne’e hodi promove no hakbi’it koñesimentu sidadaun, partikulármente feto sira-nia direitu atu hatene no asesu informasaun, iha ne’ebé relevante hodi suporta sira nian moris liuhusi asesu ba edukasaun ida ho kualidade, fasilidade saúde no rekursus seluk tan.
“Asesu ba informasaun mak forsa xave ba dezenvolvimentu. Ba ne’e, Uniaun Europeia hakarak suporta Governu Timor-Leste liuhusi meius oioin, inklui suporta organizasaun sosiedade sivil, hanesan CEPAD, atu nune’e, sidadaun Timoroan bele iha asesu ba informasaun, la’ós de’it atu hatene sira nian direitu, maibé mos iha kuñesimentu klean nune’e bele foti desizaun sira informadu di’ak liu tan, no monitoriza situasaun ne’ebé afeta ba sira nia moris.”, hatete Embaisadór Uniaun Europeia, Andrew Jacobs.
Eventu lansamentu ne’e marka prezensa husiMinistru Asuntu Parlamentár no Komunikasaun Sosiál, Francisco Martins da Costa Jerónimo no akompaña husi Sekretária Estadu ba Igualdade no Inkluzaun, Maria do Rosário de Fátima Correia, Embaisadór Uniaun Europeia iha Timor-Leste, Andrew Jacobs hamutuk ho Grupu Traballu Nasionál-Liberdade Asesu ba Informasaun, reprezentante sira husi komunidade, Pontu Fokál no Funsionáriu Públiku sira,e ne’ebé mai husi Munisípiu 12 inklui RAEOA, Autoridade Lokál no konvidadu sira seluk mak reprezenta organizasaun sosiedade sivíl no Akademia.
Liuhusi apoiu Uniaun Europeia nian, CEPAD hala’o ona sesaun foku grupu sira utiliza Manuál sidadaun hodi fasilita diskusaun ho komunidade sira iha Postu Administrativu 32 iha Munisípiu 12 inklui RAEOA, ne’ebé partisipa husi komunidade hamutuk 486 (feto 370 no mane 116) iha tinan 2021. (*)