“Prezidente Repúblika, José Ramos Horta, halo inisitiva hirak ne'e bazeia ba ninia diskursu ne'ebé halo durante investidura iha Tasitolu, iha loron 19 fulan-maiu 2022, katak nia hakarak Palásiu Prezidensiál Nicolau Lobato ne’e nakloke ba públiku”, dehan nia liuhusi komunikadu imprensa ne'ebé www.tempotimor.com asesu husi gabinete Prezidente Repúblika, kinta (30/06).
Tanba ne'e, Prezidénsia Repúblika hakarak fó-énfaze liután katak Palásiu Prezidensiál la’ós merkadu, maibé Prezidénsia Repúblika ida-ne’e hakarak fornese ai-fuan lokál ba labarik sira, ne’ebé nu’udar produtu lokál diretamente fa’an husi ai-leba sira.
Ba kompromisu ida-ne'e mak iha loron 20 Maiu 2022, hafoin serimónia solene komemorasaun Loron Restaurasaun Independénsia RDTL ba dala 20, Prezidente José Ramos-Horta deside autoriza kedas Palásiu Prezidensiál nakloke ba sidadaun hotu no ba labarik sira hodi tama, atu nune’e hatudu imajen ba públiku katak Palásiu ne’e besik liuba povu, liliu ba labarik sira.
Tanba ne’e preokupasaun sira ne’ebé hato’o husi deputadu Parlamentu Nasionál sira-ne’e, parte Prezidénsia Repúblika nian hakarak informa no klarifika ba públiku katak, Prezidente Repúblika, José Ramos Horta, halo Inisitiva hirak ne'e bazeia ba ninia diskursu ne'ebe halo durante investidura iha Tasitolu, iha loron 19 fulan-Maiu 2022.
Prezidente Repúblika halo inisiativa hirak ne'e tanba mós haree ba peskiza balun fó-sai katak labarik Timoroan sira la gosta han ai-fuan. Tanba ne’e, ho asaun fahe ai-fuan ba labarik sira ne’e, sai hanesan insentivu ida atu motiva labarik sira atubele hán ai-fuan sira.
Tanba iha mós inisiativa seluk kona-ba fó-atensaun maka’as ba inan isin-rua sira atu mai hetan ai-hán nutritivu ruma no akompañamentu seluk tan iha Palásiu.
Iha-ne'e Prezidente Repúblika mós sei loke kantina ida iha Palásiu Presidensiál atu sai nu’udar fatin ba diskusaun ho entidade sira hothotu, purezemplu akadémiku sira, grupu agrikultura sira, juventude sira, no seluk-seluk tan.
Nune'e mós sei lori estudante sira mai vizita Palásiu Prezidensiál iha kada loron sesta, hodi koñese kle’an liután divizaun servisu sira Palásiu Prezidensiál nian.
“Ikus liu, parte Prezidénsia Repúblika hakarak mós realsa tan ba públiku katak asaun umanitária sira ne’ebé hala’o ne’e sinkroniza tebes ho figura Prezidente Repúblika, José Ramos Horta nian hanesan Premiadu Nobel ba Pás no membru Juri Konsellu Fraternidade Umana ne’ebé inisia husi Amu Pápa Santu Francisco. Hanesan líder konsiliadór no dialogante ida, Prezidente Repúblika nu’udar Xefe Estadu hakarak tane aas tebes nosaun ida katak, valoriza dignidade pesoál umana ne’e nu’udar objetivu Estadu nian”, esplika nia. (*)
