Tuir informasaun ne’ebé www.tempotimor.com asesu iha pájina MSSI, kinta (30/06) katak, akordu refere asina iha Edifísiu Sentral-MSSI-Kaikoli-Díli, loron kuarta (29/06), ho objetivu atubele proteje no asegura direitu ba traballadór Timoroan sira ne’ebé hala’o servisu iha Portugal nomós traballadór Portugal ne’ebé hala’o servisu iha Timor-Leste, ho durasaun tinan lima (5).

Vise-Primeira Ministra no Ministra Solidariedade Sosiál no Inkluzaun-(MSSI), Armanda Berta dos Santos hatete, asina konvensaun bilaterál ida entre Timor-Leste ho Portugal kona-ba sistema seguransa sosiál nian, iha seguransa sosiál iha buat rua de’it, rejime kontributivu no naun kontributivu, tanba ne’e timoroan sira ne’ebé mak servisu iha Portugal no sidadaun portugal ne’ebé mak servisu iha Timor-Leste sira nia direitu la bele lakon.

“Mibé ba futuru sira-nia direitu sei proteje no asegura ba prestasaun servisu ne’ebé mak sira hala’o. Ba oin, Portugal no Timor-Leste sei haree ninia implementasaun”, dehan nia.

Nune’e mós, Sekretáriu Estadu Seguransa Sosiál Portugal, Gabriel Bastos hatete, konvensaun ne’ebé asina ho objetivu atu hahú koordena sistema seguransa sosiál ba nasaun Timor-Leste no Portugal nomós premite traballadór Portugal ne’ebé mai servisu iha Timor-Leste no Traballadór Timor-Leste ne’ebé mak hala’o servisu iha Portugal bele garante no proteje sira-nia direitu liga ho prestasaun sosiál.

Iha asina konvensaun ida-ne’e hetan partisipasaun husi Prezidente Institutu Nasionál Seguransa Sosiál (INSS), Longinhos Armando, Diretór Jerál, Diretór Nasionál no Xefes Departamentu- sira iha MSSI. (*)