Ministru Prezidénsia Konsellu Ministru (MPKM), Fidelis Leite Magalhães hatete, survey ne'e importante tebes tanba bele hatene impaktu husi Pólitika ka Programa ne'ebé Governu halo ba sidadaun sira.
“Partisipa ne'e, atu halo lansamentu ofisiál ba rezultadu survey Tatoli ne'ebé The Asian Foundation halo apoiu husi Governu Aústralia. Survey ne'e, importante tebes tanba bele hatene impaktu husi Polítika ka Programa ne'ebé Governu halo ba ita-nia sidadaun sira. Tanba survey ida ne'e, foti hanoin no persepsaun husi ita-nia sidadaun sira ne'ebé halo ho forma random sampling”, dehan Ministru Fidelis iha Salaun City-8 Manleuana, tersa (17/05).
Tanba sidadaun sira apresia ho intervensaun sira hotu ne'ebé Governu halo iha kontestu luta kontra propagasaun Covid-19. Nune’e sidadaun sira rekoñese kona-ba intervensaun Governu nian iha parte saúde nian, hanesan Vasina no medidas apoiu sira ne'ebé Governu fó durante pandemia Covid-19 hahú husi tinan 2020 to’o agora.
“Entaun sidadaun sira kontinua iha konfiansa katak ita-nia nasaun ne'e, iha dalan ne'ebé di'ak. Bainhira ekipa survey sira husu ba respondente sira. Rejistu mós dezenvolvimentu sira kona-ba klas polítika sira-nian liliu iha transmisaun sira, katak nasaun ne'e ba oin iha kontinuasaun ne'ebé di'ak”, afirma nia.
Maibé mós iha prekupasaun balun mak, responde sira hatan iha situasaun Covid-19 fó impaktu no halo mudansa ba ekonomia.
“Ita mós rejista maioria feto sira barak mak sofre moras violénsia domestika ne'ebé presiza kombate hodi feto sira labele sei vítima ba violénsia domestika no gravasaun fiziku sira husi sira-nia la’en no família sira”, dehan nia.
Iha mós prekupasaun seluk mak infraestrutura bázika sira liliu estrada sira ne'ebé responde sira komunidade husu atu investe liután iha estrada no infraestrutura bázika sira hodi fasilita atividade ekonomia sira muda potensiál sidadaun sira-nian iha atividade negósiu sira.
Enkuantu rezultadu sondajen persepsaun públiku ba dahituk nian ne'ebé hala'o iha fulan-janeiru no fevereiru 2022 ho amostra ne'ebé nasionalmente reprezenta ho totál respondente 2.489.
Deskobrimentu sira ne'e refleta povu Timoroan sira-nia opiniaun kona-ba diresaun nasaun nian, nomós sira-nia moris di'ak no prioridade sira. (*)
