Tuir informasaun ne’ebé www.tempotimor.com asesu iha pájina AIFAESA katak, Inspetór Jerál Interinu Dionísio hatete, nia parte louva no apresia tebes ba joven na’in-4, ne'ebé sai ezemplár, atu dehan katak husi joven rihun tomak maibé ida ne'ebé dedika-an ho vontade no sintidu voluntarízmu.

“Ita-boot na’in-4 sai ezemplár, tanba ita akompaña observa hela buat voluntarizmu ema hothotu hakarak hakna'ar an apoiu instituisaun tantu setór privadu”, dehan nia iha Sede AIFAESA Matadoru.

Tanba ne’e, husu ba voluntáriu na’in-4 ne'e atu mantein nafatin servisu profesionalizmu, hahalok ne'ebé hatudu profisionál no patriotízmu.

“Tanba profisionalizmu ne'ebé ita-boot sira iha presiza kria hosi respeitu, badinas no disiplina. Ho nune'e hatudu ita-boot sira-nia matenek aplika saida mak ita-boot sira iha, atu nune'e ba oin ita-boot sira-nian kareira nakloke liután”, afima nia.

Reprezentante voluntáriu, António Fernandes Pereira, hato'o sira-nia agradese ba instituisaun AIFAESA, hosi suprior masímu to'o funsionáriu, tanba bele simu sira na’in-4 no akompaña sira voluntáriu, ho nune'e aprende buat balun durante fulan 3 nia laran.

Iha ne’e Diretora, Floriana Azete Pinto husu ba voluntáriu na’in-4, lori buat ne'ebé di'ak ba to'o iha idak-idak nia fatin no husu atu aproveita de'it saida mak di’ak iha bele simu, buat ne'ebé mak a'at rai hela, tanba futuru Timor-Leste nian iha joven sira nia liman.

Enkuantu Departamentu ne'ebé voluntáriu na’in-4 hakna'ar ba mak hanesan Departamentu Administrasaun Finansas no Departamentu Meterolojia no padronizasaun. (*)