Tanba diálogu nu’udar dalan ida atu lideransa nasionál sira bele fera ulun hamutuk hodi haree krize sosiál ho situasaun mundiál ne'ebé akontese fó impaktu mós ba Timor-Leste.

“Ita la tau atensaun urjente, bele iha impaktu boot ba ki'ak sira-nia moris, liliu ba ha'u-nia preokupasaun númeru ida mak kosok-oan sira, labarik sira, joven, inan sira isin-rua, no ferik katuas sira. Prontu tenke haree oinsá fera ulun hamutuk, para haree estratejia investimentu ne'ebé di'ak liuba ida ne'e”, hatete Horta hafoin hasoru Mari Alkatiri iha rezidénsia Raról, kinta (05/05).

Ba situasaun sosiál ho umanitáriu ne'ebé akontese presiza buka atu rezolve hamutuk nune'e ba oin, haree situasaun seluk hanesan movimentu ekonómia, tanba Timor-Leste sorte ona povu moris iha dame nia laran, laiha krize oioin hanesan iha Mianmar no nasaun sira seluk.

Tanba situasaun sira ne'e hotu, Timor-Leste iha hela fundu soberanu atu bele uza hodi rezolve, entaun lideransa sira tenke ko'alia haree atu iha klima di'ak ida depois Prezidente Eleitu bele mós ko'alia filafali ho lideransa sira seluk.

“Klaru e Maun Xanana mós hatete iha partidu CNRT, primeiru prioridade númeru ida mak tomada pose la'o di'ak, segundu labele halo buat ruma ke bele provoka instabilidade iha rai ne'e ho situasaun atual difísil ne'e”, afirma nia. (*)